Kharif Sowing : चाकण परिसरात केवळ २० टक्केच पेरण्या

Pune News : चाकण व परिसरातील गावात अद्यापही पुरेसा पाऊस पडला नसल्याने खरीप हंगामाच्या पेरण्या मात्र खोळंबल्या आहेत. चाकण व परिसरातील गावात केवळ २० टक्के पेरण्या झालेल्या आहेत.

पेरणीसाठी पुरेशी ओल झाल्यानंतरच शेतकऱ्यांनी पेरण्या कराव्यात, असे आवाहन चाकण मंडल कृषी अधिकारी गोविंद नाळे यांनी केले आहे. दरम्यान, उद्या पाऊस पडेल या आशेवर शेतकरी पेरण्या करत आहेत.

चाकण (ता. खेड) परिसरामध्ये खरीप हंगामाच्या पेरण्या सध्या सुरू आहेत, परंतु आतापर्यंत फक्त २० टक्केच पेरण्या झालेल्या आहेत. या पेरण्यामध्ये सोयाबीनचे प्रमाण मोठ्या प्रमाणात आहे. सोयाबीन खालोखाल मका, वाल, उडीद, मूग आदींच्या पेरण्या शेतकरी करीत आहेत.

चाकण व परिसरामध्ये जूनच्या शेवटच्या आठवड्यात पावसाची थोडीशी रिमझिम वाढली असल्याने शेतकऱ्यांनी मशागतीला वेग दिला. परंतु पाऊस पाहिजे तसा पडत नसल्यामुळे ओढे, नाले यांना पाणी आले नाही. तसेच शेतातही पाणी साचले नाही. तरीही शेतकरी थोड्याशा ओलीवर पेरण्या करीत असून, काही गावांमध्ये मशागतीला आणि पेरणीला वेग आला आहे.

चाकणच्या पश्‍चिम पट्ट्यातील काही गावांमध्ये भाताची रोपे टाकण्यास शेतकऱ्यांनी सुरुवात केलेली आहे. पूर्व पट्ट्यात उसाचे पीक मोठ्या प्रमाणात घेतले जाते. सध्या खरीप हंगामातील पिकांच्या पेरण्या करण्यासाठी शेतकरी प्रयत्न करीत आहेत. बहुतांश शेतकरी सोयाबीनचा उत्पादन खर्च कमी असल्याने व सोयाबीनला योग्य भाव मिळत असल्याने शेतकरी सोयाबीन पीक घेण्याकडे वळले आहेत.

प्रगतिशील शेतकरी पंडित कोतवाल यांनी सांगितले, की बहुतांश शेतकरी बैलाने मशागती करताना दिसत नाहीत. परिसरात बैलांचे प्रमाण घटले आहे, त्यामुळे ट्रॅक्टरद्वारे शेती केली जाते. यामध्ये नांगरणी, पेरणी ही ट्रॅक्टरने केली जाते. एका तासाला हजार ते बाराशे रुपये ट्रॅक्टरमालक घेतात. ट्रॅक्टरने पेरणी, मशागत लवकर होते, त्यामुळे बहुतांश शेतकरी ट्रॅक्टरचा मशागत व पेरणीसाठी वापर करीत आहेत.