तासगावात आजपासून राष्ट्रीय बळीराजा साहित्य संमेलन

सांगली ः ‘‘राजर्षी शाहू जयंतीच्या पार्श्‍वभूमीवर दोन दिवसीय पहिले राष्ट्रीय बळीराजा साहित्य संमेलन (Baliraja Sahitya Sammelan) तासगाव येथे आजपासून सुरू होत आहे. संमेलनाचे अध्यक्ष शेतीनिष्ठ विचारवंत राजकुमार घोगरे आहेत. स्वागताध्यक्ष द्राक्षगुरू सुभाष आर्वे हे आहेत. तासगाव येथील नगरपालिकेच्या साने गुरुजी सांस्कृतिक सभागृहात संमेलन होईल,’’ अशी माहिती संमेलनाचे निमंत्रक बाळासाहेब रास्ते यांनी दिली.

या संमेलनाचे उद्‍घाटन कृषी, सहकार राज्यमंत्री विश्‍वजित कदम यांच्या हस्ते होईल. बीजमाता राहीबाई पोपेरे या प्रमुख पाहुण्या असतील. खासदार संजय पाटील, आमदार सुमन पाटील, बाबाराजे देशमुख, प्रा. डॉ. बाबूराव गुरव, ह.भ.प. तुकाराम महाराज बागडे, रघुनाथ पाटील, रोहित पाटील हे उपस्थित राहतील.

शेतकऱ्यांने पिकविलेले विकले गेले पाहिजे. पिकवताना त्याला कमी खर्चात टिकवता आले पाहिजे, यासाठी अनेक तज्ज्ञ मार्गदर्शन करतील. आज (ता. २६) सकाळी ९ वाजता शेती अवजारे पूजन व ग्रंथ दिंडी होईल. दुपारी एक वाजता उद्‍घाटन सोहळा होईल. त्यानंतर पहिल्या सत्रात ‘मिथला घाट की बलीराजा सभ्यता’ या विषयावर चर्चासत्र होईल. त्यात देशभरातील तज्ज्ञ भाग घेतील. दुसऱ्या सत्रात ‘भारतीय शेती व शेतकऱ्यांचे प्रश्‍न व त्यावरील उपाय’ यावर मार्गदर्शन होईल. या वेळी कवी संमेलनही होईल.

सोमवारी तासगाव येथील ओवीकार अर्जुन थोरात व मंडळी बिरूदेव ओवीकर मंडळातर्फे ‘ओवी बळीराजाची’ का कार्यक्रम होईल. ‘महासम्राट बळीराजाची कृषी संस्कृती’ या विषयावर ह. भ. प. धर्मकीर्ती महाराज (परभणी), प्रीती राऊत (नागपूर)

मार्गदर्शन करतील. ‘शेती शेतकरी व आपल्या महामानवांचे विचारधारा व कार्य’ यावर मार्गदर्शन करतील. त्यानंतर विशेष सन्मान सोहळा होईल. त्यात महात्मा फुले कृषी विद्यापीठाचे कुलगुरू प्रशांतकुमार पाटील, राजकुमार घोगरे, आमदार अरुण लाड, वैभव नायकवडी, दिगंबर कांबळे, अरुण खरमाटे आदी उपस्थित राहतील.