नाशिक : जिल्ह्यात गेल्या सप्ताहापासून सुरू असलेल्या धोधो पावसाने (Heavy Rain In Nashik) पेठ, सुरगाणा, इगतपुरी, त्र्यंबकेश्र्वर व कळवण तालुक्यांत धुमाकूळ घातला आहे. त्यामुळे सर्वत्र दाणादाण उडाल्याने शेतीपिकांसह (Crop Damage Due To Heavy Rain) घरांची पडझड, जनावरे मृत होण्यासह मोठे नुकसान झाले होते; मात्र गेल्या दोन दिवसांपासून पावसाचा जोर काहीसा कमी झाल्याचे दिसून आले. त्यामुळे विस्कळीत झालेले जनजीवन हळूहळू पुन्हा पूर्वपदावर येऊ लागले आहे.
रविवारी (ता. १७) नाशिक शहरासह ग्रामीण भागात सूर्यदर्शन झाल्याने सततच्या पावसापासून शेतकऱ्यांना काहीशी सुटका मिळाली होती; मात्र सोमवारी (ता. १८) सकाळपासून संततधार पावसाने नाशिक शहरासह पश्चिम भागात हजेरी लावली; मात्र गेल्या सप्ताहानंतर पाऊस कमी झाला आहे. पाणलोट क्षेत्रातही पाऊस सुरू असल्याने धरणातून विसर्ग सुरू आहे; मात्र पावसाचा जोर कमी झाल्यानंतर विसर्ग घटविण्यात आला आहे. गंगापूर धरण समूहातील प्रमुख गंगापूर धरणातून विसर्ग कमी केला आहे. त्यामुळे पाण्याखाली गेलेला पंचवटी परिसरात पाणी कमी झाले आहे.
गेल्या दहा दिवसांपासून सुरू असलेल्या पावसामुळे जिल्ह्यातील मध्यम व मोठ्या २४ धरण प्रकल्पात मोठ्या प्रमाणावर पाण्याची आवक झाली आहे. सध्या धरणांमध्ये ५२,५४५ दलघफू पाणीसाठा झाला असून ही टक्केवारी ८० टक्के आहे. मागील वर्षी हाच साठा १८,५८० दलघफू इतका होता तर टक्केवारी अवघी २८ टक्के होती. त्यामुळे ५२ टक्क्यांनी तो वाढला आहे. सध्या ८ धरणे तुडुंब भरली आहेत. सोमवारी(ता. १८) गंगापूर, आळंदी, पालखेड, करंजवण, वाघाड, ओझरखेड, पुणेगाव, तिसगाव, दारणा, भावली, वालदेवी, कडवा, भोजापूर, चणकापूर, हरणबारी, केळझर, गिरणा या १७ धरणांमधून विसर्ग सुरू आहे; मात्र गेल्या दोन दिवसांपासून धरणातील विसर्ग मोठ्या प्रमाणावर कमी करण्यात आला आहे.
प्रामुख्याने गंगापूर, दारणा व गिरणा धरण समूहाच्या पाणलोट समूहातील झालेल्या मुसळधार पावसामुळे पश्चिम-उत्तर भागातील अनेक नद्यांना पूर आल्याने काठच्या शिवाराची दाणादाण उडाली आहे. गेल्या सप्ताहापासून त्रंबकेश्वर, इगतपुरी, पेठ व सुरगाणा तालुक्यातील भात, नागली, वरई लागवडी तर कळवण, सटाणा व देवळा या तालुक्यातील शिल्लक राहिलेल्या पेरणीही वापसा नसल्याने खोळंबल्या आहेत. सुरगाणा तालुक्यात पाऊस कमी झाला आहे. इगतपुरी, पेठ, दिंडोरी, त्र्यंबकेश्वर तालुक्यांत पाऊस सुरू आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.