Sindhudurg Rain Update : सिंधुदुर्गात मुसळधार पाऊस

Sindhudurg Rain News : जिल्ह्यात मुसळधार पाऊस सुरू असून नदी-नाले पुन्हा दुथडी भरून वाहू लागले आहेत. पावसामुळे रखडलेल्या भातरोप पुनर्लागवडीला वेग आला आहे. दरम्यान शुक्रवार (ता. १४) सकाळपासुनच जिल्ह्यात जोरदार पाऊस पडत आहे.

जिल्ह्यात गेल्या काही दिवसांपासून पावसाने दडी मारली होती. काही भागांत हलका तर काही भागांत मध्यम स्वरूपाच्या पावसाच्या सरी पडत होत्या. मात्र त्याचा भातरोप पुनर्लागवडीकरिता उपयोग होत नव्हता. त्यामुळे पावसावर अवलंबून असलेली भातरोप पुनर्लागवड थांबली होती.

दरम्यान गुरुवारपासून (ता. १३) जिल्ह्यात पावसाचा जोर वाढण्यास सुरुवात झाली. गुरुवारी सकाळपासून जिल्ह्याच्या सर्व भागांत पावसाच्या हलक्या ते मध्यम सरी कोसळत होत्या. परंतु दुपारनंतर पावसाचा जोर वाढला.

त्यानंतर सायकांळी उशिरा जिल्ह्यात सर्वत्र मुसळधार पाऊस सुरू होता. रात्रभर पावसाच्या सरी कोसळल्या. त्यामुळे नदी-नाले दुथडी भरून वाहू लागले आहेत. पावसाचे दमदार कमबॅक झाल्यामुळे शेतकऱ्यांनी पुन्हा एकदा भातरोप पुनर्लागवडीला सुरुवात केली आहे.

सोमवारपर्यंत मुसळधार पावसाचा अंदाज

जिल्ह्यात शुक्रवारी (ता. १४) सकाळपासून मुसळधार पाऊस पडत असून १७ जुलैपर्यंत जिल्ह्याच्या सर्व भागांत मुसळधार पावसाचा अंदाज हवामान विभागाने दिला आहे.