Sindhudurg Rain Update : सिंधुदुर्ग जिल्ह्यात पावसाचा जोर वाढला

Sindhudurg Rain News : गेल्या चार-पाच दिवसांच्या तुलनेत सिंधुदुर्गात बुधवारी (ता. १२) रात्रीपासून पावसाचा जोर वाढला. गुरुवारी (ता. १३) पहाटेपासून पावसाच्या सरीवर सरी पडत आहेत. पावसामुळे दोन तीन दिवसांपासून खंड पडलेल्या भातरोप पुनर्लागवडीला पुन्हा सुरुवात होण्याची शक्यता आहे.

जिल्ह्यात गेल्या चार-पाच दिवसांपासून पावसाने उघडीप दिली होती. काही भागांत हलक्या तर काही भागात मध्यम स्वरूपाच्या सरी पडत होत्या. मात्र त्याचा भातरोप पुनर्लागवडीकरिता उपयोग होत नव्हता.

त्यामुळे भातरोप पुनर्लागवड थांबली होती. अनेक शेतकऱ्यांनी भातरोपे काढून ठेवली आहेत. त्यामुळे शेतकरी पावसाच्या प्रतीक्षेत होते. बुधवारी रात्रीपासून पावसाचा जोर काहीसा वाढला आहे. रात्री पावसाच्या चांगल्या सरी जिल्ह्याच्या सर्व भागांत बरसल्या.

त्यानंतर गुरुवारी पहाटेपासूनदेखील पावसाचा जोर वाढल्याचे चित्र आहे. या पावसामुळे शेतीच्या कामांना पुन्हा सुरुवात होईल, भातरोप पुनर्लागवडीत पडलेला खंड थांबण्याची शक्यता आहे.

काही शेतकऱ्यांनी पाऊस पडेल अशा शक्यतेने भातरोपे काढून ठेवलेली आहेत. या रोपांची पुनर्लागवड वेळेत होणे आवश्यक होते. बुधवारी रात्रीपासून पाऊस सुरू झाल्यामुळे शेतकऱ्यांचे संभाव्य नुकसान टळण्याची शक्यता आहे.