Khandesh Rain : खानदेशात भीज पाऊस

Jalgaon News : खानदेशात मागील दोन दिवस अपवाद वगळता चांगला पाऊस झाला आहे. भीज पावसाने पिकांनाही लाभ होत आहे. तसेच सिंचन प्रकल्पांतील साठाही वाढत आहे. गिरणा धरणाचा साठा ३६ टक्क्यांवरून शनिवारी (ता. ९) सकाळी सहा वाजता ४४ टक्के एवढा झाला.

गिरणा धरणाचा सर्वाधिक लाभ जळगावला होतो. त्याची क्षमता १८ टीएमसी असून, सर्वांत मोठा सिंचन प्रकल्प म्हणून गिरणा धरणाची ओळख आहे. गिरणा नदीच्या उगम क्षेत्रात व नाशिकच्या पूर्व, उत्तर भागात चांगला पाऊस झाल्याने गिरणा धरणात आवक वाढली आहे. या धरणाचा साठा पाच दिवसांपूर्वी फक्त ३६ टक्के एवढा होता.

त्यात मोठी वाढ दोनच दिवसांत झाली आहे. गिरणा धरणाच्या माध्यमातून जळगाव जिल्ह्यात चाळीसगाव, पाचोरा, भडगाव, एरंडोल, धरणगाव तालुक्यांतील सुमारे २१ हजार हेक्टर क्षेत्रातील रब्बी पिकांना लाभ होतो. मागील चार वर्षे गिरणा धरण सतत १०० टक्के भरले आहे. मागील वर्षी ऑगस्टअखेरीस धरणात १०० टक्के जलसाठा झाला होता. पण यंदा कमी पाऊस सुरुवातीपासून असल्याने धरणात हवा तसा साठा नव्हता.

जामनेरातील (जि. जळगाव) वाघूर नदीवरील वाघूर प्रकल्पातील जलसाठाही वाढला असून, हा साठा ६५ टक्क्यांवर पोहोचला आहे. या धरणाची साठवण क्षमता नऊ टीएमसी आहे. या धरणातील जलसाठा ५७ टक्के एवढा होता. तसेच जामनेरातील तोंडापूर मध्यम प्रकल्पातही जलसाठा वाढत आहे.

चाळीसगावमधील मन्याड, पाचोऱ्यातील बहुळा, अग्नावती व एरंडोलातील अंजनी प्रकल्पातील जलसाठा मात्र फारसा वाढलेला नाही. पारोळ्यातील बोरी प्रकल्पातही जलसाठा किंचित वाढला आहे. धुळ्यातील मालनगाव, अमरावती, बुराई, सोनवद या

प्रकल्पांतील जलसाठाही फारसा वाढलेला नाही. जुलैमधील पावसामुळे जळगाव जिल्ह्यात रावेरातील मंगरूळ, अभोडा, सुकी, यावलमधील गारबर्डी व निंबादेवी (लघू प्रकल्प), धुळ्यातील पांझरा, नंदुरबारमधील दरा व देहली हे प्रकल्प १०० टक्के भरले होते.

 संततधार सुरूच

खानदेशात गुरुवारी (ता. ७) अनेक भागांत पाऊस झाला. पण काही भागांत पावसाचे आगमन झालेले नव्हते, परंतु शुक्रवारी (ता. ८) सर्वदूर पाऊस झाला. गुरुवारी सकाळी व दुपारी जळगाव, धरणगाव, एरंडोल, भुसावळ, जामनेर, धुळ्यातील साक्री, नंदुरबारमधील शहादा, नवापूर, तळोदा या भागांत पाऊस झाला.

शुक्रवारी रात्री पावसाची संततधार सुरूच होती. काही भागांत मध्यम तर काही भागांत जोरदार पाऊस अधूनमधून झाला. या पावसामुळे पाण्याचा निचरा न होणाऱ्या तापी, गिरणा, पांझरा नदीकाठावरील काळ्या कसदार जमिनीत पाणी साचले आहे. सखल भागात पाणी तुंबले असून, कापूस पिकाला फटका बसू शकतो, अशी स्थिती आहे.

चोवीस तासांतील पाऊस (मिलिमीटरमध्ये)

जळगाव जिल्हा ः जळगाव ४०, धरणगाव ३६, एरंडोल ४१, भुसावळ ३५. धुळे जिल्हा ः धुळे ३०, शिरपूर ३९. नंदुरबार जिल्हा ः नंदुरबार ३०, शहादा ४१, तळोदा ४५.