Diploma In Veterinary Science : डिप्लोमा इन व्हेटरनरी सायन्स अभ्यासक्रमाला हिरवा कंदील

Nagpur News : राज्यात प्रस्तावित इंग्रजी माध्यमाच्या पशुसंवर्धन विषयक पदविका अभ्यासक्रमाबाबत येत्या तीन महिन्यांत प्रक्रिया पूर्ण करावी, अशा सूचना पशुसंवर्धन मंत्री राधाकृष्ण विखे-पाटील यांनी गुरुवारी (ता.२२) दिल्या.

या अभ्यासक्रमास काहींनी आक्षेप घेत खोडा घालण्याचे काम केले होते. परिणामी यंदाच्या सत्रापासून या अभ्यासक्रमाची अंमलबजावणी होणार नाही, अशी स्थिती होती. त्या संदर्भाने मंगळवारी (ता.२०) ‘ॲग्रोवन’मधून वृत्त प्रकाशित होताच पशुसंवर्धनमंत्र्यांनी गुरुवारी बैठक घेतली.

पुणे जिल्हाधिकारी कार्यालय परिसरातील या बैठकीला मंत्री विखे-पाटील, पशुसंवर्धन सचिव जे. पी. गुप्ता, आयुक्‍त डॉ. हेमंत वसेकर, पशुचिकित्सा व्यवसायी संघटनेचे अध्यक्ष डॉ. सुनील काटकर, डॉ. भगवान पाटील, डॉ. मारोती कानोलो, डॉ. संजय पाटील यांच्यासह ‘माफसू’चे कुलगुरू डॉ. शरद गडाख, संस्थाचालकांचे प्रतिनिधी उपस्थित होते.

या बैठकीत येत्या तीन महिन्यांत हा अभ्यासक्रम सुरू करण्यासंबंधीची प्रक्रिया राबविण्याचा निर्णय घेण्यात आला. त्यामुळे यंदाच्या शैक्षणिक सत्रापासून अभ्यासक्रम सुरु होण्याचा मार्ग सुकर झाल्याची स्थिती आहे.