Radhanagari Dam : राधानगरीचे पाच दरवाजे उघडले

Kolhapur News : जिल्ह्यात धरणक्षेत्रात होत असलेल्या पावसामुळे राधानगरी धरणाचे पाच स्वयंचलित दरवाजे बुधवारी (ता. २६) सकाळी दहा वाजता उघडले. धरणातून सध्या ७११२ क्युसेक पाण्याचा विसर्ग होत असल्याची माहिती पाटबंधारे विभागाने दिली. सकाळी ८ वाजून १५ मिनिटांनी पूर्ण क्षमतेने धरण भरले.

यानंतर ८ वाजून ४० मिनिटांनी धरणाचा ५ आणि ६ नंबरचा असे दोन स्वयंचलित दरवाजे उघडले. यानंतर अवघ्या तासाभरात आणखी दोन दरवाजे उघडल्याने धरणाच्या स्वयंचलित अशा एकूण पाच दरवाजांतून विसर्ग सुरू आहे. घाटमाथ्यासह जिल्ह्यात पावसाचा जोर ओसरला असला तरी पंचगंगेच्या पातळीत किंचित वाढ होण्याची शक्यता आहे.

राधानगरी धरणाचे पाणी कुंभी, कासारी या नद्यांच्यानंतर पंचगंगा नदीत पात्रात येते. यामुळे पंचगंगेची पातळी वाढण्याची शक्यता आहे. धरणातून विसर्ग सुरू झाला, पावसाचा जोरही कायम राहिला; तर पाणी पातळीत सात ते आठ फुटांपर्यंत वाढ होण्याची शक्यता वर्तविण्यात आली आहे. त्या दृष्टीने नागरिकांनी आतापासूनच सुरक्षितस्थळी स्थलांतरित व्हावे, असे आवाहन जिल्हाधिकारी राहुल रेखावार यांनी केले आहे.

जिल्हा प्रशासनाने संभाव्य पूरबाधित २७ गावांतील शाळांना सुट्टी जाहीर करण्यात आली आहे. तसेच पाणी वाढण्यापूर्वी पूर बाधित गावांना स्थलांतर होण्याचे आवाहन करण्यात आले आहे. याचबरोबर कोकणाला जोडणारा महत्त्वाच्या कोल्हापूर-गगनबावडा मार्गावर बालिंगा पुलावरील वाहतूक दुसऱ्या दिवशीही बंदच होती.

पन्हाळा तालुक्यातील नावली पैकी धारवाडी परिसरात डोंगर खचल्याने ६० कुटुंबांना सुरक्षितस्थळी हलवण्यात आले. जिल्ह्यातील ८० बंधारे पाण्याखाली असून, ६६ मार्ग बंद आहेत. गेल्या २४ तासांत पाच पक्की घरे पूर्णतः, तर १६ पक्क्या आणि ५५ कच्च्या घरांची अंशत: पडझड झाली. अतिवृष्टीमुळे १२ राज्यमार्ग व २४ जिल्हामार्ग बंद झाल्याची माहिती बांधकाम विभागाच्या विशेष प्रकल्प समन्वय अधिकाऱ्यांनी दिली.