Sugarcane FRP : ‘घोडगंगा’ची पहिली उचल प्रतिटन अडीच हजार रुपये

पुणे : शिरूर तालुक्यातील न्हावरे येथील रावसाहेबदादा पवार घोडगंगा सहकारी साखर कारखान्याकडून (Ghodganga Sugar Mill) २०२२-२३ या चालू गळीत हंगामासाठी (Crushing Season) आलेल्या उसाला प्रतिटन (Sugarcane FRP) दोन हजार पाचशे रुपयांप्रमाणे उचल दिल्याची माहिती कारखान्याचे अध्यक्ष ऋषिराज अशोक पवार यांनी दिली.

‘घोडगंगा’च्या चालू गळीत हंगामाची माहिती अध्यक्ष पवार यांनी ही माहिती दिली. कारखान्याची सध्या अडचणीतून वाटचाल सुरू असली; तरी हा हंगाम यशस्वी झाल्यास कारखान्याची स्थिती पूर्वपदावर येईल.

कारखान्याने चालू गळीत हंगामात आजअखेर एक लाख ३६ हजार ५७० टन उसाचे गाळप केले असून, १०.४७ टक्के साखर उताऱ्याने एक लाख ३९ हजार ८५० क्विंटल साखरेचे उत्पादन केले आहे.

गळीत हंगामात गाळपास आलेल्या उसाला अॅडव्हान्स (उचल) देण्याचा निर्णय संचालक मंडळाने घेतला असून प्रतिटन दोन हजार पाचशे रुपयांप्रमाणे होणारी रक्कम सभासद शेतकऱ्यांच्या खात्यामध्ये वर्ग केली आहे.

घोडगंगा हा आपला हक्काचा साखर कारखाना असून ही संस्था अडचणीतून आणि पुन्हा गतवैभवाने उभी करायची असेल, तर अधिकाधिक उसाचे गाळप व्हायला हवे. कारखान्याला भरपूर ऊस गाळपासाठी मिळाला, तर त्यापटीत बाजारभाव देण्यासाठी कारखान्याची स्थिती सक्षम होईल.