Onion Market : ‘एनसीसीएफ’ला कांदा विकणारे अडचणीत

Nashik Onion News : १ फेब्रुवारी ते ३१ मार्च दरम्यान उत्पादन खर्चाखाली विक्री झालेल्या कांद्याला जास्तीत जास्त २०० क्विंटल प्रतिशेतकरी याप्रमाणे प्रतिक्विंटल ३५० रुपयेप्रमाणे राज्य सरकारतर्फे अनुदान दिले जाणार आहे.

त्यामध्ये बाजार समिती, खासगी बाजार समिती, थेट पणन परवानाधारक व ‘नाफेड’ खरेदी केंद्रावर विक्री केलेल्या शेतकऱ्यांना ते मिळणार, असे २७ मार्च रोजीच्या शासन निर्णयात स्पष्ट करण्यात आले आहे.

मात्र त्यात ‘एनसीसीएफ’ असा उल्लेखच नाही. तसेच जिल्हा उपनिबंधक यांनी अंतिम केलेल्या कांदा अनुदान अहवालात पात्र घटकांमध्येही असा उल्लेख नसल्याने गोंधळ उडाला आहे. त्यामुळे ‘एनसीसीएफ’साठी विक्री केलेल्या कांदा उत्पादक शेतकऱ्यांना अनुदान मिळणार की नाही, असा प्रश्‍न उपस्थित झाला आहे.

लेट खरीप कांद्याचे दर घसरल्यानंतर केंद्र सरकारने लाल कांद्याची खरेदी करावी, अशी मागणी झाली. त्यानंतर अन्न, नागरी पुरवठा व ग्राहक संरक्षण मंत्रालयातर्फे ‘नाफेड’ व भारतीय राष्ट्रीय ग्राहक सहकारी महासंघ (एनसीसीएफ) हे दोन प्रमुख खरेदीदार शिवार खरेदीत उतरले.

तर उपखरेदीदार म्हणून शेतकरी उत्पादक कंपन्यांनी कामकाज केले. मात्र असे असताना राज्य सरकारने कांदा अनुदानाच्या घेतलेल्या निर्णयात ‘नाफेड’चा स्पष्ट उल्लेख आहे; मात्र ‘एनसीसीएफ’चा उल्लेख कुठेही नाही.

‘नाफेड’साठी प्राप्त झालेल्या १,८८२ अर्जांपैकी १,७१० अर्ज पात्र झाले. त्यापैकी १७२ अर्ज अपात्र ठरले. त्यांना प्रतिक्विंटल ३५० रुपयांचे अनुदान मिळणार आहे. मात्र ‘एनसीसीएफ’चा उल्लेख कुठेही नाही. परिणामी खरेदी केंद्रावर विक्री केलेले शेतकरी अनुदानाला मुकण्याची शक्यता आहे.

‘एनसीसीएफ’चे अधिकारी कायमच ‘नॉट रिचेबल’

भारतीय राष्ट्रीय ग्राहक सहकारी महासंघ (एनसीसीएफ) यांनी जिल्ह्यात ९ शेतकरी उत्पादक कंपन्यांच्या महासंघाच्या माध्यमातून जवळपास दीड हजार शेतकऱ्यांकडून कांदा खरेदी केली. कुठे झाली याची कल्पनाही केंद्रीय मंत्र्यांपासून कुठल्याही यंत्रणेला नाही.

कायम ‘नॉट रिचेबल’ असलेल्या ‘एनसीसीएफ’ने कुठलाही पाठपुरावा जिल्हा निबंधक कार्यालयाकडे केला नसल्याचे समोर आले आहे. ‘एनसीसीएफ’च्या नाशिक शाखेचे व्यवस्थापक परिक्षित एम. यांच्याकडे शेतकरी, माध्यमे संपर्क करतात; मात्र संबंधित अधिकारी कुठलाही प्रतिसाद देत नाहीत.