Wild Boar Crop Damage : कळंबमध्ये उसाचे रानडुकरांकडून नुकसान

Crop Damage News : सततच्या दुष्काळी परिस्थितीमुळे पीक जगविताना शेतकरी मेटाकुटीला येत आहे. त्यातच अतोनात खर्च करून कष्टाने जागविलेल्या पिकात मागील काही दिवसांपासून इटकूर, शिराढोन, लोहटा पूर्व व पश्चिम, खडकी आदी ग्रीन बेल्ट असलेल्या परिसरात रान डुकरांनी अक्षरशः हैदोस घातला असून प्रामुख्याने ऊस शेतीचे मोठे नुकसान केले आहे.

यामुळे वन विभाग काय झोपा काढत आहे काय? असे संतप्त सवाल शेतकरी उपस्थित करीत असून नुकसान झालेल्या ऊसाचे पंचनामे करून शेतकऱ्यांना आर्थिक मदत द्यावी अशी मागणी स्वाभिमानी शेतकरी संघटनेकडून करण्यात येत आहे.

मागील काही दिवसांपासून रान डुकराचे जत्थेच्या जत्थे उसाच्या फडात घुसून नुकसान करीत आहेत. त्यामुळे शेतकऱ्यांचे न भरून येणारे नुकसान होत आहे.

शिराढोंन, खडकी, लोहटा पूर्व व पश्चिम, आदी ग्रीन बेल्ट असलेल्या परिसरात रान डुकरांचा उच्छाद वाढला आहे. रान डुकरांचे कळप उसाच्या फडात ठाण मांडून बसले आहे. यात ऊस शेतीचे मोठ्या प्रमाणात नुकसान सुरू असल्याचे शेतकऱ्यांनी सांगितले. त्यांनी शेतातच मुक्काम ठोकला आहे.