पुणे : राज्याचे पणन संचालकपद (Marketing Director) औट घटकेचे ठरले आहे. विद्यमान पणन संचालक सुनील पवार (Sunil Pawar) ३० नोव्हेंबर रोजी सेवानिवृत्त झाल्यानंतर अपर निबंधक विकास रसाळ यांची नियुक्ती करण्यात आली होती. मात्र एक दिवस काम केल्यानंतर त्याच दिवशी गुरुवारी (ता. १) संध्याकाळी त्यांची नियुक्ती रद्द केल्याचे आदेश मंत्रालयातून धडकले आणि एका दिवसाचे संचालक पद औट घटकेचे ठरले.
दरम्यान, पणन संचालक पदाचा अतिरिक्त कार्यभार सहसंचालक विनायक कोकरे यांच्याकडे सोपविण्यात आला असून, पूर्णवेळ संचालकपदी कोणाची वर्णी लागते याकडे बाजार समित्यांचे लक्ष लागले आहे. सुधीर तुंगार यांचे नाव याकरिता आघाडीवर असल्याची चर्चा आहे.
पणन संचालक हे पद सहकार क्षेत्रातील बिगर सनदी अधिकाऱ्यांनंतरचे सर्वात मोठे पद आहे. हे पद अप्पर आयुक्त विशेष निबंधक श्रेणीतील असून, सुनील पवार सेवानिवृत्त झाल्यानंतर हे पद अपर निबंधक पदश्रेणीत आणून यावर विकास रसाळ यांची नियुक्ती करण्यात आली होती. या पदस्थापनेवरून सहकार विभागातील अधिकाऱ्यांमध्ये चलबिचल झाल्यानंतर सहकार मंत्रालयात मोठा गदारोळ झाला.
दरम्यानच्या काळात रसाळ यांनी गुरुवारी (ता. १) पदभार स्वीकारत एक दिवस काम देखील केले. मात्र त्याच दिवशी सायंकाळी पणन संचालक पदाची पदस्थापना रद्द करत पदभार सहसंचालक विनायक कोकरे यांच्याकडे देण्याचा आदेश मंत्रालयातून निघाला आणि रसाळ यांचे पद औट घटकेचे ठरले.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
