Kharif Crop : तेल्हारा तालुक्यात कमी पावसामुळे पिके धोक्यात

Akola News : सातपुड्याच्या पायथ्याशी असलेल्या तेल्हारा तालुक्यात कमी पावसामुळे यंदाचा खरीप हंगाम सुरुवातीच्या टप्प्यातच अडचणीत सापडला आहे. कपाशी पिकाला रात्री-बेरात्री पाणी देण्यासाठी शेतात जावे लागत आहे. रानटी प्राण्यांची भीती वाढलेली आहे. कोरडवाहू पिके संकटात सापडली आहेत.

या तालुक्यात काही भागांत सिंचनाच्या सोयी असून काही भाग कोरडवाहू आहे. सिंचन सुविधा असलेले शेतकरी दरवर्षी मॉन्सूनपूर्व कपाशी पेरतात. यंदाही अशी पेरणी झालेली आहे.

परंतु पाऊस येत नसल्याने व वन्य प्राण्यांनी हैदोस घातल्याने शेतकऱ्यांची आर्थिक स्थिती बिघडली आहे. कोरडवाहू पट्ट्यातील शेतकरी जोरदार पाऊस पडण्याची प्रतीक्षा करीत आहेत. जुलैचा दुसरा आठवडा सुरू झाला असून, पावसाअभावी व वाढलेल्या उष्णतेमुळे कोवळी पिके कोमेजून जात आहेत.

तेल्हारा तालुक्यात खरिपाचे क्षेत्रफळ ५८ हजार ५३१.३८ हेक्टर आहे. आतापर्यंत कपाशीची ६ हजार ८५२ हेक्टरवर, तर सोयाबीन २१३५ हेक्टर, तूर ११११, ज्वारीची ०८ हेक्टरवर पेरणी झाली आहे. तालुक्यात आजवर १० हजार ९८ हेक्टरवर लागवड करण्यात आली.

यामध्ये गेल्या वर्षीच्या तुलनेत कपाशीचा पेरा वाढलेला आहे. तालुक्यात आतापर्यंत सरासरी १६१ मिलिमीटर पाऊस अपेक्षित आहे. यंदा फक्त ३४.८ मिलि पाऊस झाला आहे.