Gram Panchayat Election : ग्रामपंचायत निवडणुकीच्या प्रचाराची आज सांगता

जळगाव : जिल्ह्यात ग्रामपंचायत निवडणुकीचा (Gram Panchayat Election) प्रचार आता अंतिम टप्प्यात आहे. निवडणुकीच्या (Election) २४ तास आधी प्रचाराची सांगता आज (ता. १६) सायंकाळी होणार आहे. जळगाव तालुक्यात १२ ग्रामपंचायतींच्या निवडणुका होणार होत्या.

त्यातील दोन ग्रामपंचायती बिनविरोध झाल्या आहेत. यामुळे दहा ग्रामपंचायतींसाठी रविवारी (ता. १८) मतदान होणार आहे. तहसील प्रशासनातर्फे मतदान यंत्रे सील करण्यात आली आहेत. तालुक्यातील निवडणूक प्रक्रियेसाठी सुमारे दोनशे कर्मचाऱ्यांची नियुक्ती करण्यात आली आहे.

जळगाव तालुक्यातील उमेदवार, त्यांच्या प्रतिनिधींच्या उपस्थितीत मतदान यंत्रांमध्ये संबंधित उमेदवारांची नावे, चिन्ह्यांच्या याद्या तयार करून लावण्यात आल्या. तहसीलदार नामदेव पाटील, निवासी नायब तहसीलदार दिलीप बारी यांच्या उपस्थितीत मतदान यंत्रे सील करण्यात आली. मतदानात यंत्र मते नील असल्याचे दाखविण्यात आली.

संबंधित यंत्रात त्याच ग्रामपंचायतीच्या उमेदवारांची नावे, चिन्ह असल्याची खात्री करण्यास सांगण्यात आले. नंतरच मतदान यंत्रे सील करण्यात आली. जळगाव तालुक्यात दहा ग्रामपंचायती मिळून ३० बूथ आहेत. एका ग्रामपंचायत स्तरावर तीन बूथ असतील. त्यावर प्रत्येकी पाच कर्मचारी, अशा दीडशे कर्मचाऱ्यांची नियुक्ती करण्यात आली आहे. दहा टक्के कर्मचारी जादा ठेवण्यात आले आहेत.

दोन ग्रामपंचायती बिनविरोध

जळगाव तालुक्यात सावखेडा खुर्द व सुजदे या ग्रामपंचायती बिनविरोध झाल्या आहेत. जळगाव तालुक्यात मतदान होणाऱ्या दहा ग्रामपंचायती भादली खुर्द, भोलाणे, देऊळवाडे, घार्डी-अमोदा खुर्द, जळके, किनोद, कुवारखेडे, वराड खुर्द व बुद्रुक, वसंतवाडी, विदगाव

शनिवारी कर्मचारी रवाना होणार

ग्रामपंचायत निवडणूक रविवारी (ता. १८) असल्याने शनिवारी (ता. १७) सकाळी दहाला मतदान कर्मचारी, पोलिस बंदोबस्तासह संबंधित मतदान केंद्रांवर बसने रवाना होणार आहेत. शनिवारी सकाळी मतदान कर्मचाऱ्यांना मतदान प्रक्रियेबाबत मार्गदर्शन केले जाईल. मतदान सुरू झाल्यानंतर यंत्रात बिघाड झाल्यास पर्यायी मतदान यंत्रे ठेवण्यात येणार आहेत.