औरंगाबाद, उस्मानाबादच्या नामांतराचा ठराव मंजूर

मुख्यमंत्री एकनाथ शिंदे (Eknath Shinde) यांनी मांडलेल्या औरंगाबाद (Aurangabad) आणि उस्मानाबाद (Osmanabad) जिल्ह्याचे नामांतर करण्याच्या ठरावास विधानसभेने आज एकमताने मंजुरी दिली. त्याबाबतची शिफारस केंद्र सरकारकडे करण्यात आली आहे. या शिवाय नवी मुंबई विमानतळाला दि. बा. पाटील यांचे नाव देण्याचा प्रस्तावही मंजुर करण्यात आला.

आज पावसाळी अधिवेशनाचा शेवटचा दिवस होता. औरंगाबाद, उस्मानाबाद आणि नवी मुंबई यांच्या नामांतराचा ठराव मंजूर करण्यात आला. औरंगाबादचे नाव छत्रपती संभाजीनगर तर उस्मानाबादचे नाव धाराशिव तर मुंबई विमानतळाचे नाव दि. बा. पाटील असे करण्यात आले, या नावांना आज मंजूरी देण्यात आली.

औरंगाबाद आणि उस्मानाबाद जिल्ह्याचे नाव बदलून अनुक्रमे संभाजीनगर (Chatrapti Sambhaji nagar) आणि धाराशिव (Dharashiv) असे करण्यात यावे, अशी मागणी गेल्या कित्येक वर्षांपासून होत होती. मागील सरकारने शेवटच्या मंत्रिमंडळाच्या बैठकीत तो ठराव मंजूर केला होता. पण, नव्या एकनाथ शिंदे आणि देवेंद्र फडणवीस यांच्या सरकारने तो ठराव रद्द केला हेाता. त्यानंतर या सरकारने पुन्हा तो ठराव केला होता. तो आज विधानसभेत मांडून मंजूर करून घेतला.

दरम्यान औरंगाबाद आणि उस्मानाबाद जिल्ह्याच्या नामांतराचे ठराव मंजूर झाल्यानंतर युवा सेनेचे प्रमुख आदित्य ठाकरे यांनीही एक सूचना केली. ते म्हणाले की, दि. बा. पाटील विमानतळाच्या नावाचा आज ठराव झाला आहे. तसेच, छत्रपती संभाजी महाराज विमानतळाचाही ठराव दोन वर्षापूर्वी झाला होता. उपमुख्यमंत्री फडणवीस आणि सरकारने या ठरावांसोबत त्याचाही पाठपुरावा करावा आणि लवकरात लवकर ते नावही देण्यात यावं. त्यावर उपमुख्यमंत्री फडणवीस (Devendra Fadanvis) यांनी याबाबत तातडीने पाठपुरावा करण्यात येईल, असे उत्तर दिले.