Kharif Season : नांदगावची आणेवारी कमाल ३६ पैसे

Nashik News : जिल्ह्यात सर्वांत कमी पर्जन्यवृष्टी झालेल्या नांदगाव तालुक्यातील प्राथमिक नजर पैसेवारी कमीत कमी ३२ पैसे ते जास्तीत जास्त ३६ पैसे अशी निघाली आहे. त्यात तालुक्यात ३३ गावे ३२ पैसे, ४१ गावे ही ३४ पैसे, २५ गावे ३६ पैसे अशा प्रकारे प्राथमिक नजर आणेवारी असून, मनमाड दोनची नजर आणेवारी ३३ पैसे निघाली आहे.

तालुक्यातील जवळपास शंभर गावातली खरिपातील उत्पन्नाची मोठ्या प्रमाणात आलेली घट आल्याने सप्टेंबर महिन्यातील प्राथमिक पैसे नजर आणेवारी चाळीस पैशांच्या आत आली असली तरी वीस ते पंचवीस पैसे अशीच प्राथमिक नजर आणेवारी येणे अपेक्षित असताना ती किमान चाळीस पैसे निघाल्याने नजीकच्या काळातील दुष्काळ जाहीर होण्यासाठीच्या प्रक्रियेसाठी मात्र अनुकूल ठरली आहे.

पैसेवारी पन्नास पैशाच्या खाली आल्यास दुष्काळ जाहीर होण्यासाठीची स्थिती गृहीत धरून शासनाकडून तशाप्रकारे घोषणा होत असते. त्यानंतर दुष्काळी गावांमध्ये कृषी पंपाच्या वीज बिलामध्ये सवलत, विद्यार्थ्यांची परीक्षा शुल्क माफ, जमीन महसुलात सूट आदी उपाययोजनांना चालना दिली जाते. यासह शेतकऱ्यांना पिकांच्या नुकसानीपोटी मिळणारे अनुदान, आर्थिक मदत, पीकविमा मिळण्यासाठी अनेक घटकांचा विचार केला जातो. यामध्ये पैसेवारी ही खूप महत्त्वाची मानली जाते.

खरीप आणि रब्बी हे दोन महत्त्वाचे हंगाम असून, या हंगामात निघालेल्या उत्पादनावर येथील आर्थिक व्यवहार अवलंबून असतात. या दोन्ही हंगामात महसूल प्रशासनाकडून पैसेवारी काढून झालेल्या उत्पादनाचा लेखाजोखा घेतला जातो. त्यामुळे आणेवारी वरून दुष्काळाचे मूल्यमापन केले जाणार आहे. आता डिसेंबर महिन्यातील अंतिम आणेवारी महत्त्वाची ठरणार आहे.

तालुक्यात पावसाची टक्केवारी सध्या अवघे ३८ टक्क्याची असून खरिपाचा सर्व हंगाम वाया गेल्यात जमा असल्याने आमदार सुहास कांदे यांनी कृषी व महसूल विभागाच्या संयुक्त आढावा बैठकीत वस्तुनिष्ठ अहवाल पाठवावेत अशा सूचना संबंधितांना दिल्या होत्या त्यानुसार प्राथमिक टप्प्यातील हाती आलेले उत्पन्न गृहीत धरून प्राथमिक पैसे नजर आणेवारी जाहीर झाली आहे.