Amravati News कृषी उत्पन्न बाजार समितीच्या संचालक पदासाठीच्या निवडणुकीचा (APCM election) कार्यक्रम राज्य सहकारी निवडणूक प्राधिकरणाने जाहीर केला आहे. २८ एप्रिलला मतदान होणार असून तीन दिवसांत निकाल जाहीर होणार आहे. मे महिन्याच्या पहिल्या सप्ताहात संचालक मंडळ अस्तित्वात येणार आहे.
जिल्ह्यातील बारा बाजार समितीच्या अंतिम मतदार यादी २० मार्चला जाहीर झाल्या आहेत. त्यामुळे सहकार क्षेत्रातील धुरीणांचे लक्ष निवडणुकीच्या कार्यक्रमाकडे लागले होते. ती प्रतीक्षा आता संपली आहे. राज्य सहकारी प्राधिकरणाने जाहीर केलेल्या कार्यक्रमानुसार २७ मार्चपासून प्रक्रिया प्रारंभ होणार आहे.
२७ मार्च ते ३ एप्रिल या कालावधीत इच्छुकांना निवडणुकीसाठी नामनिर्देशन दाखल करता येणार आहे. ६ एप्रिल ते २० एप्रिलपर्यंत अर्ज मागे घेण्याची मुदत असून, अंतिम उमेदवारांची यादी २१ एप्रिलला जाहीर करण्यात येणार आहे.
यापूर्वी निवडणूक प्रक्रिया २३ डिसेंबर २०२२ पासून प्रारंभ होणार होती. मात्र त्या निवडणुकीत जुन्याच मतदारांची नावे असल्याने नव्याने निवडून आलेल्या कृषी पतसंस्था, सेवा सहकारी व ग्रामपंचायतीचे नव्याने निवडून आलेले सदस्य मतदानापासून वंचित राहणार होते. या विरोधात उच्च न्यायालयाच्या मुंबई, नागपूर व औरंगाबाद खंडपीठात याचिका दाखल झाल्या होत्या.
यावर निर्णय देताना हायकोर्टाने १ सप्टेंबर २०२२ नंतर निवडून आलेल्या सदस्यांना मतदार यादीत समाविष्ट करण्याचे आदेश देत कार्यक्रम पुढे ढकलण्याचे व ३० एप्रिलपर्यंत निवडणुका घेण्याचे आदेश दिले. अमरावती जिल्ह्यातील अमरावती, अचलपूर, दर्यापूर, धारणी, मोर्शी, वरूड, चांदूर बाजार, चांदूररेल्वे, धामणगावरेल्वे, तिवसा, नांदगाव खंडेश्वर व अंजनगावसुर्जी या समितीच्या संचालक मंडळाची मुदत दोन वर्षांपूर्वीच १३ ऑक्टोबर २०२० ला संपुष्टात आली आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
