महाडमध्ये कृषी सप्ताह साजरा

आचळोली, जि. रायगड ः श्री भैरवनाथ निसर्ग मंडळ संचलित कृषी, कृषी जैव तंत्रज्ञान आणि अन्नतंत्रज्ञान महाविद्यालय आणि कृषी विभागाच्या संयुक्त विद्यमाने कृषी दिन आणि १ ते ७ जुलैदरम्यान कृषी सप्ताह साजरा करण्यात आला.

विद्यार्थ्यांनी “जय जवान, जय किसान” हा नारा देत पालखीसह वृक्ष-दिंडीचे आयोजन केले होते. याची सुरुवात महाडमधील वीरेश्‍वर मंदिरापासून झाली. विद्यार्थांनी महाड शहरातील नागरिकांमध्ये पथनाट्याच्या माध्यमातून वृक्ष लागवडीबाबत जनजागृती केली. या वेळी तहसीलदार सुरेश काशीद, तालुका कृषी अधिकारी लक्ष्मण कोतवाल आणि कृषी महाविद्यालयाचे प्राचार्य डॉ. वैभव गिम्हवणेकर यांनी मार्गदर्शन केले.

त्यानंतर नागरिकांना रोपांचे वाटप करण्यात आले. या कार्यक्रमाच्या नियोजनामध्ये कृषी महाविद्यालयातील प्राध्यापक आणि विद्यार्थांचा सहभाग होता. कार्यक्रमाचे सूत्र संचालन अर्चना महाजन आणि आभार प्रदर्शन विद्या पवार यांनी केले.