Pune News : पुणे बाजार समितीमधील फळे, भाजीपाला विभागातील डमी अडत्यांना चाप लावण्यासाठी संचालक मंडळाने प्रत्येक अडत्याने दोन मदतनीस असल्याचे प्रतिज्ञापत्र रविवार (ता.१६) अखेर सादर करण्याचे आदेश दिले होते. मात्र या आदेशाला अडत्यांनी केराची टोपली दाखवत आदेश धुडकावले आहेत. रविवारअखेर एकाही अडत्याने प्रतिज्ञापत्र सादर केलेले नाही. यामध्ये खुद्द दोन व्यापारी संचालकांचा देखील समावेश आहे.
बाजार समितीमध्ये अनेक अडत्यांनी गाळे भाडेतत्वावर देऊन, इतर व्यवसायात आपले बस्तान बसविले आहे. तर अनेक अडते स्वतः व्यापार न करता केवळ नियमबाह्य भाडे घेत आहेत. अडत्यांच्या या बेकायदेशीर कार्यपद्धतीमुळे डमी अडत्यांचा सुळसुळाट बाजार समितीमध्ये झाला आहे.
एका एका गाळ्यावर ५ ते १० डमी अडते बेकायदेशीर काम करीत आहेत. त्यांच्यावर नियंत्रण आणण्यासाठी संचालक मंडळाने दोन मदतनीस ठेवण्यास मान्यता दिली आहे. या मदतनीसांचे फोटो आणि पत्त्यासह प्रतिज्ञापत्र सादर करण्याचे आदेश बाजार समिती प्रशासनाने अडत्यांना दिले होते. मात्र रविवारी (ता.१६) मुदतसंपली तरी एकाही अडत्याने प्रतिज्ञापत्र सादर केलेले नाही.
...त्या दोन संचालकांची अडचण
डमी अडते प्रश्नावर संचालक मंडळाने निर्णय घेतला असला तरी बहुमत हे इतर गटातून आलेल्या संचालकांचे आहे. त्यामुळे बाजारातील अडते गटातून आलेल्या संचालकांची चांगलीच अडचण होत आहे. संचालक मंडळाबरोबर निर्णय झाल्यानंतर बाजारातील अडत्यांना तोंड देताना या दोन संचालकांची चांगलीच अडचण झाली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.