Fish Culture : उजनी जलाशयात ५० हजार मत्स्यबीज सोडले

पळसदेव, ता. इंदापूर ः ठेकेदारी पद्धतीने मासेमारीला (Fishing) विरोध करत उजनीवरील बेकायदेशीर परप्रांतीय मच्छीमारांना हटविण्यासाठी व उजनीत मत्स्यबीज (Fish Culture) सोडण्याच्या मागणीसाठी २००८ मध्ये तीव्र आंदोलन करण्यात आले होते.

त्या आंदोलकांच्या स्मरणार्थ भिगवण (ता. इंदापूर) मत्स्यबीज केंद्राच्या वतीने पळसदेव येथे सोमवारी (ता. ९) उजनी जलाशयात ५० हजार मत्स्यबीज सोडण्यात आले. टप्प्याटप्प्याने सुमारे दीड लाख मत्स्यबीज सोडण्यात येणार असल्याची माहिती यावेळी अॅड. पांडुरंग जगताप यांनी दिली.

उजनीवर असलेला परप्रांतीय मच्छीमारांचा मक्ता, त्यांच्याकडून होणारी मासळी बिजाची मासेमारी, यामुळे स्थानिक मच्छीमारांना मिळणारी डावी वागणूक या सर्व त्रासाला कंटाळून स्थानिक मच्छीमारांनी २००८ मध्ये मोठे आंदोलन उभे केले होते. स्थानिक मच्छीमारविरुद्ध परप्रांतीय व ठेकेदार असा संघर्ष सन १९९५पासून सुरू होता.

सदर आंदोलकांनी वेळोवेळी उजनी धरणासह सोलापूर, पुणे, मुंबई येथे आंदोलने केली. यावेळी आंदोलकांनी परप्रांतीय मच्छीमारांच्या जाळ्यांची जाळपोळ केली होती. यावेळी शेकडो स्थानिक मच्छीमार आंदोलकांवर जाळपोळीचे गुन्हे दाखल झाले होते. दहा वर्षांनंतर हे सर्व आंदोलक निर्दोष सुटले आहेत.

दरम्यानच्या काळात या आंदोलनात सहभागी असलेल्या धोंडिबा नगरे, शिवाजी इरीचे, मच्छिंद्र नगरे, मोहन परदेशी यांचे निधन झाले. या आंदोलनकर्त्यांच्या आठवणी स्मरणात राहाव्यात यासाठी भिगवण मत्स्यबीज केंद्राने दीड लाख मत्स्यबीज सोडण्याचा निर्णय घेतला आहे.

सुमारे तीन लाख रुपये किमतीचे पन्नास हजार मत्स्यबीज सोमवारी (ता.९) पळसदेव येथील उजनीपात्रात पाटबंधारे विभागाचे उपअभियंता नितीन खाडे, मराठा महासंघाचे जिल्हाध्यक्ष अॅड. पांडुरंग जगताप, सरपंच उज्ज्वला परदेशी, कर्मयोगीचे संचालक भूषण काळे, सुजित मोरे, मेघराज कुचेकर,

सीताराम नगरे, संजय दरदरे, नितीन इरीचे, पप्पू सल्ले, विठ्ठल भोई, पोपट नगरे आदींच्या हस्ते सोडण्यात आले. उर्वरित मत्स्यबीज टप्प्याटप्प्याने सोडण्यात येणार आहे. कार्यक्रमाचे आयोजन राहुल नगरे,अनिल नगरे, अजित मल्लाव, कांतिलाल नगरे, बलभीम भोई, युवराज नगरे यांनी केले होते.