Fertilizer Supply : डीएपीच्या नावावर ‘प्रॉम’, ‘पीडीएम’ खतांचा पुरवठा

अमरावती : प्रॉम (फॉस्फेट रिच अॉर्गेनिक मॕन्यूअर) आणि पीडीएम (पोटॕश डिराईव्हड फॉर्म मोलॕसेस) खताची (Fertilizer) डीएपीच्या (DPA Fertilizer) नावावर विक्री करण्याचा गोरखधंदा शेतकऱ्यांनीच उधळून लावला. चांदूरबाजार तालुक्यातील जसापूर येथील या घटनेत पुरवठा (Fertilizer Supply) करण्यात आलेले खत रामतीर्थ येथील पातुर्डे कृषी सेवा केंद्रातील असल्याचे कृषी अधिकाऱ्यांनी सांगितले.

चांदूर बाजार तालुक्यातील जसापूर येथे महिनाभरापूर्वी काही युवकांनी जाऊन सर्वेक्षण केले होते. यावेळी शेतकऱ्यांना घरपोच डीएपी खताचा पुरवठा करणार असल्याचे त्यांनी सांगितले. मात्र त्याकरिता आगाऊ नोंदणी करावी लागणार असल्याने ठराविक रक्कमेची मागणी करण्यात आली. प्रयोगशील शेतकरी प्रदीप बंड यांच्याकडूनही त्यांनी नऊ पोत्यांकरिता ३ हजार रुपये आगाऊ स्वीकारले.

मात्र हा सारा प्रकार बनवाबनवीचा असल्याचे लक्षात आल्यानंतर त्याच वेळी प्रदीप बंड यांनी उपविभागीय कृषी अधिकारी राहुल सातपुते यांना माहिती दिली. शुक्रवारी (ता.७) छोट्या मालवाहू वाहनातून खत घेऊन काही युवक गावात आले. पडताळणीत प्रॉम आणि पीडीएम खत दिले जात असल्याचे लक्षात आले.

बॅगवर ५०० ते ६०० रुपये किंमत असताना शेतकऱ्यांकडून प्रत्येक पोत्यासाठी १५०० रुपये घेतले होते. कृषी अधिकाऱ्यांनी खत जप्त करून त्याचे नमुने प्रयोगशाळेकडे पाठविले. त्याचा अहवाल आल्यानंतर कारवाई करू, असे सातपुते म्हणाले.

चांदूरबाजार तालुक्यात ४० बॕगांचा पुरवठा

चांदूरबाजार तालुक्यात ४० बॕग खतांचा पुरवठा करण्यात आला. हे खत दर्यापूर तालुक्यातील रामतीर्थ गावच्या पातुर्डे कृषी सेवा केंद्रातील असल्याची बाब प्राथमिक चौकशीत समोर आली आहे.

रोशन पातुर्डे हे या कृषी सेवा केंद्राचे संचालक असून त्यांची शेतकरी कंपनी असल्याचा खुलासा होताच दर्यापूर तालुका कृषी अधिकाऱ्यांनी तडकाफडकी रामतीर्थ गाठत संबंधितांची झाडाझडती घेतल्याची माहिती आहे. त्यामुळे आता याप्रकरणी पुढील काय कारवाई होते, याकडे सर्वांचे लक्ष लागले आहे.