Agricultural Assistants Recruitment : कृषी सहायकांची १९१ पदे रिक्त

अॅग्रोवन वृत्तसेवा
Agricultural Assistants Post : जळगाव ः खरीप हंगामात (Kharif season) कृषी विभाग महत्त्वपूर्ण काम करतो. मात्र काही वर्षांपासून जळगाव जिल्ह्यात कृषी विभाग निम्मा रिकामा आहे.

एकूण १ हजार ५१ पदे मंजूर असताना, केवळ ५२६ पदे भरली आहेत. ५४५ पदे म्हणजेच अर्धा विभागच रिक्त आहे. काही भागांत तालुका कृषी अधिकारीच नाही.

१९१ पदे कृषिसेवक, कृषी सहायकांची रिक्त आहेत. यामुळे कृषी विभाग सलाइनवर असल्याचे चित्र आहे.

खरीप हंगाम सुरू झाल्यानंतर अतिवृष्टी झाल्यास पंचनामे करण्यास कृषी सहायक, कृषिसेवकांची गरज भासते.

खत, बियाण्यांच्या काळ्या बाजारावर ते लक्ष ठेवतात. शेतकऱ्यांना मार्गदर्शन वा अन्य मदतीला हेच पुढे असतात.

ग्लोबल वार्मिंगमुळे आता हिवाळा, उन्हाळ्यातही अतिवृष्टी होते. त्या नुकसानीचे पंचनामे करण्यास लागलीच त्यांना कंबर कसावी लागते. तेव्हा कोठे पंचनाम लवकर होतात.

गतवर्षी अनेक वेळा अतिवृष्टी झाली होती. अपुऱ्या कृषी सहायक, सेवकांमुळे पंचनाम्यांना उशिर झाला होता. परिणामी, उशिरा शेतकऱ्यांच्या हातात मदत आली.

तालुक्यात कृषीच्या नवीन व जुन्या योजनांची अंमलबजावणी करण्यासाठी, तालुक्यातील शेतकऱ्याच्या अडीअडचणी सोडविण्यासाठी तालुका कृषी अधिकाऱ्यांची नियुक्ती असते.

मात्र जिल्ह्यात पंधरापैकी दहा तालुक्यांत तालुका कृषी अधिकारीच असल्याचे विदारक चित्र आहे. सर्व ठिकाणी प्रभारीराज सुरू आहे.

कृषी विभागातील रिक्त पदांचा तपशील
संवर्ग मंजूर पदे भरलेली पदे रिक्त पदे
कृषी पर्यवेक्षक १११ ६१ ५०
अधीक्षक २ १ १
कृषी सहायक/सेवक ४९५ ३०४ १९१
वरिष्ठ लिपिक ७२ ३१ ४१
अनुरेखक ८० ७ ७३
वाहनचालक २१ ७ १४
रोपमळा मदतनीस २० २ १८
श्रेणी १ मजूर २५ १ २४
शिपाई ९६ ४२ ५४
पहारेकरी १४ ७ ७