Agri Assistant Recruitment : कृषी सहायकांची रिक्त पदे भरण्याची प्रक्रिया १५ दिवसांत सुरू करणार; कृषिमंत्री अब्दुल सत्तार यांची माहिती

बाळासाहेब पाटील : ॲग्रोवन वृत्तसेवा
मुंबई : ‘‘कृषी विभागातील (Department of Agriculture) कृषी सहायकांच्या (Agriculture Assistant) २११५ रिक्त पदांसाठी पुढील १५ दिवसांत जाहिरात काढण्यात येईल. तसेच कृषी सहायकांना सहायक कृषी अधिकारी असे पदनाम करण्यासाठी लवकरच निर्णय करू,’’ अशी माहिती कृषिमंत्री अब्दुल सत्तार यांनी विधानपरिषदेत दिली.

सतीश चव्हाण, अब्दुलखान दुर्राणी आणि रणजितसिंह मोहिते-पाटील यांनी उपस्थित केलेल्या प्रश्नाला सत्तार यांनी उत्तर दिले.

राज्यातील कृषी सहायकांची १७५७ पदे रिक्त असल्याने शेतकऱ्यांना सेवा मिळण्यात अडचणी येत आहेत.

एका कृषी सहायकावर १० ते १५ गावांचा कार्यभार आहे. तसेच बराच काळ पदे भरली नसल्याने कृषी पदवीधरांमध्ये प्रचंड असंतोष आहे. ही पदे कधी भरणार, अशी विचारणा सदस्यांनी केली.

यावर कृषिमंत्री सत्तार म्हणाले, ‘‘कृषी विभागात सहायकांची ११५९९ पदे मंजूर आहेत. फेब्रुवारी २०२३ अखेर ९४८४ पदे भरली असून २११५ पदे रिक्त आहेत.

सध्या १८ टक्के पदे रिक्त आहेत. त्यामुळे काही सहायकांवर अतिरिक्त कार्यभार देण्यात आला आहे. वित्त विभागाने पदभरतीबाबत निर्बंध शिथिल केले आहेत.

मात्र आकृतिबंध अंतिम केलेला नाही. अशा विभागांना सरळसेवेच्या कोट्यातील ८० टक्के पदे भरण्यास मान्यता दिली आहे. त्यानुसार भरती सुरू आहे.’’

‘‘दरम्यान अनुसूचित क्षेत्रातील पदे निश्चित करण्याचे निकष बदलण्यात आले आहेत. त्यानुसार कृषी सहायक संवर्गाची सुधारित बिंदूनामावली प्रमाणित करून घ्यायची कार्यवाही संबंधित विभागीय कृषी सहसंचालक स्तरावर सुरू आहे.

त्यानुसार पुढील १५ दिवसांत कृषी सहायकांच्या पदासाठी जाहिरात देऊन पदभरती केली जाईल,’’ असे सत्तार यांनी सांगितले.

सहायक कृषी अधिकारी असे नामांतर करा
राम शिंदे यांनी कृषी सहायकांना सहायक कृषी अधिकारी असे नाव देण्याची मागणी केली. असे केल्याने त्यांच्या पगारात कोणताही फरक पडणार नाही, किंवा सरकारी तिजोरीवर भार पडणार नाही.

त्यामुळे या पदाचा दर्जा वाढेल, म्हणून असे नामकरण करावे, अशी मागणी केली. यावर सत्तार यांनी ‘पुढील १५ दिवसांत हा निर्णय घेऊ,’ असे सांगितले.