Maharashtra Rain: पुढील पाच दिवस हवामान कसे राहील? देशात कोणत्या भागात पाऊस पडतोय?

Rain Update : राज्यात सध्या वातावरणात थंडी वाढत आहे. तर दुपारी उन्हाचा चटकाही जाणवत आहे. तर दक्षिण भारतात काही ठिकाणी पावसाच्या सरी पडत आहेत.

राज्यात सध्या सकाळी हवेत गारवा जाणवत आहे. अनेक भागात थंडी वाढल्याचे दिसते. तर काही ठिकाणी ढगाळ वातावरण होते. पण आज पावसाची नोंद नव्हती. राज्यात पुढील पाच दिवस पावसाचा अंदाज नसल्याचेही हवामान विभागाने स्पष्ट केले. शनिवारी सिंधुदूर्ग जिल्ह्यात काही ठिकाणी हलक्या पावसाचा अंदाज आहे. पण जोरदार पावसाची शक्यता नसल्याचे हवामान विभागाने स्पष्ट केले.

श्रीलंका आणि शेजारच्या भागात चक्राकार वाऱ्याची स्थिती आहे. ही स्थिती समुद्रसपाटीपासून ३.६ किलोमीटर उंचीवर आहे. पश्चिमी विक्षोप समुद्रपाटीपासून ५.८ किलोमीटर उंचीवर आहे. तसेच बंगालचा उपसागराकडून दक्षिण भारताकडे जोराचे वारे वाहत आहेत. या कारणांमुळे पुढील सात दिवस दक्षिण भारतात हलका ते मध्यम पाऊस पडेल, असा अंदाज आहे. तमिळनाडू आणि करेळच्या काही भागात पुढील तीन दिवस पाऊस पडू शकतो. तर कर्नाटकच्या दक्षिण भागात ३ आणि ५ नोव्हेंबरला पावसाची शक्यता आहे, असाही अंदाज हवामान विभागाने दिला.