Maharashtra Winter Weather : नव्या वर्षात गुलाबी थंडीची प्रतीक्षा

Pune News : राज्याच्या काही भागांत पहाटेच्या वेळी असलेले धुक्याचे साम्राज्य, तसेच अंशतः ढगाळ हवामानामुळे किमान तापमानात वाढ होत थंडी गायब झाली आहे. दुपारच्या वेळी उकाड्यात वाढ झाल्याचे चित्र आहे. आज (ता. १) विदर्भासह राज्याच्या किमान तापमानात घट होण्याची शक्यता हवामान विभागाने वर्तविली आहे. उत्तरेकडील थंड वाऱ्यांच्या अभावामुळे नववर्षात गुलाबी थंडीसाठी आणखी काहीशी प्रतीक्षा करावी लागणार आहे.

उत्तर भारतातील राज्यांमध्ये थंडीचा कडाका कमी अधिक होत आहे. मंगळवारी (ता. ३१) राजस्थानच्या उत्तरलाई येथे देशाच्या सपाट भूभागावरील नीचांकी ३.५ अंश सेल्सिअस तापमानाची नोंद झाली. पावसाळी वातावरणामुळे राज्यात थंडी कमी झाली असून, अनेक ठिकाणी सकाळी उशिरापर्यंत दाट धुके पाहायला मिळत आहे. मंगळवारी (ता. ३१) धुळे येथील कृषी महाविद्यालयात येथे नीचांकी १३.२ अंश तापमान नोंदले गेले.

राज्यात अंशतः ढगाळ हवामान होत असल्याने उकाड्यात वाढ झाली आहे. आज (ता. १) विदर्भासह राज्याच्या किमान तापमानात २ ते ३ अंशांची घट होण्याची शक्यता हवामान विभागाने वर्तविली आहे. किमान तापमानात घट झाली तरी थंडीसाठी दोन दिवस वाट पाहावी लागणार आहे.

मंगळवारी (ता. ३१) सकाळी ८.३० वाजेपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे ३१.७ (१५.४), अहिल्यानगर ३०.९ (१५.५), धुळे २८.५ (१३.२), जळगाव २८.२ (१५.९), जेऊर ३३ (१६.५), कोल्हापूर ३१.१ (१८.२), महाबळेश्‍वर २५.२ (१५), मालेगाव २७.२ (१८), नाशिक २९.७ (१६.६), निफाड २८.५ (१४.५), सांगली ३२.२ (१८.५),

सातारा ३१.७ (१६.९), सोलापूर ३४ (१८.६), सांताक्रूझ ३४.५ (२०.३), डहाणू २८.२ (१९.९), रत्नागिरी ३५.४ (२१.७), छत्रपती संभाजीनगर २९.८ (१७.४), धाराशिव ३०.१ (१६.१), परभणी ३०.५ (१८.०), परभणी कृषी विद्यापीठ ३०.७ (१४.८), अकोला ३०.३ (१८.६), अमरावती ३० (१६.८), भंडारा २८ (१५.६), बुलडाणा २७ (१८.४), ब्रह्मपुरी ३१.२ (१६.१), चंद्रपूर ३१, गडचिरोली ३० (१७), गोंदिया २८.१ (१३.५), नागपूर २९.१ (१६.४), वर्धा २९.१ (१७.४), वाशीम ३०.८ (२०), यवतमाळ २९.५.