Maharashtra Rain Alert : राज्यात ४ दिवस पावसाची उघडीप राहणार; बुधवारी राज्यातील काही भागात हलक्या ते मध्यम पावसाचा अंदाज

Pune News : उत्तर ओडिशात ठळक दाब क्षेत्र निर्माण झाले आहे. पुढील १२ तासात हे कमी दाब क्षेत्र विरण्याची शक्यता आहे. तर राज्यात पुढील ४ दिवस बहुतांशी भागात पावसाची उघडीप राहील, असा अंदाज हवामान विभागाने दिला.

राज्यातील बहुतांशी ठिकाणी कालपासून पावसाची उघडीप आहे. तर दुपारी उन्हाचा चटका जाणवत असून काही भागात सकाळी हवेत गारवाही जाणवत आहे.

हवामान विभागाने पुढील ४ दिवस राज्यातील बहुतांशी भागात पावसाची उघडीप राहील असा अंदाज दिला. तर सोमवारी कोकण आणि मध्य महाराष्ट्रातील काही ठिकाणी हलक्या पावसाची शक्यता हवामान विभागाने व्यक्त केली.

मंगळवारीही कोकण आणि मध्य महाराष्ट्रात काही ठिकाणी हलक्या पावसाचा अंदाज हवामान विभागाने दिला.

तर बुधवारी विदर्भातील यवतमाळ, भंडारा, गोंदीया, चंद्रपूर आणि गडचिरोली या जिल्ह्यांमध्ये काही ठिकाणी विजांसह हलक्या ते मध्यम पावसाचा अंदाज आहे. तर कोकण, मध्य महाराष्ट्र आणि मराठवाड्यातील काही भागात हलक्या ते मध्यम पावसाचा अंदाज हवामान विभागाने दिला.