Maharashtra Weather: महाराष्ट्रातील तापमानाचा पारा चढला; पुढील दिवसांत आणखी वाढ होईल!

Pune News: देशातील तापमानातील चढ उतार कायम आहेत. राज्यात उन्हाच्या झळाही वाढल्या आहेत. काही ठिकाणी तापमानाचा पारा ३६ अंशांच्याही पुढे पोचला. आज सकाळपर्यंतच्या २४ तासांमध्ये सोलापूर येथे राज्यातील उच्चांकी ३७.३ अंश सेल्सिअस तापमानाची नोंद झाली. राज्याच्या तापमानात वाढ होईल, असा अंदाज हवामान विभागाने दिला. 

उत्तर भारतातही तापमानात काहीशी वाढ झाली आहे. आज पंजाबमधील पठाणकोट येथे देशाच्या सपाट भूभागावरील नीचांकी ७.८ अंश सेल्सिअस तापमानाची नोंद झाली.

तर वायव्य भारतात १२.६ किलोमीटर उंचीपर्यंत ११० ते १२० नॉट्स वेगाने पश्चिमेकडील जोरदार वाऱ्यांचे प्रवाह वाहत आहेत. उत्तर भरतातील तापमानावर या घडामोडींचा परिणाम दिसून येत आहे. 

राज्याच्या कमाल तापमानात वाढ होत आहे. आज सकाळपर्यंतच्या २४ तासांमध्ये सोलापूरमध्ये ३७.३ अंश सेल्सिअस तापमानाची नोंद झाली होती. तर सांगली येथे ३७.२ अंश सेल्सिअस तापमानाची नोंद झाली.

जेऊर आणि परभणी येथे ३७ अंश सेल्सिअस तापमान होते. त सातारा, छत्रपती संभाजीनगर येथे कमाल तापमान ३६ अंशांवर होते. उन्हाच्या झळा चांगल्याच वाढल्या असून, उकाड्यामुळे घामाच्या धारा वाहू लागल्या आहेत. राज्यातील तापमानातील वाढ कायम राहील, असा अंदाज हवामान विभागाने दिला.