Maharashtra Weather : राज्यातील थंडीचा कडाका कमीच; राज्यातील काही भागात सकाळी धुक्याची चादर

Pune News : राज्यातील बहुतांशी भागात आजही थंडी कमीच होती. ढगाळ हवामानामुळे राज्यातील गारठा कमी झालेला आहे. तसेच धुकेही पडत आहे. या कारणांमुळे राज्यातील किमान तापमानात वाढ होण्याचा अंदाज आहे. तर उत्तर महाराष्ट्र आणि मराठवाड्यात तुरळक ठिकाणी ढगाळ वातावरण राहून अगदी काही ठिकाणीच हलक्या पावसाची काहीशी शक्यताही हवामान विभागाने व्यक्त केली.

आग्नेय अरबी समुद्रात चक्राकार वाऱ्याची स्थिती आहे. उत्तर भारतात ११० नॉट्स वेगाने पश्‍चिमेकडील जोरदार वाऱ्यांचे झोत वाहत आहेत. एकामागोमाग येणाऱ्या पश्‍चिमी चक्रवातांच्या तीव्रतेनुसार थंडी कमी-अधिक होत आहे. तसेच उत्तरेकडील राज्यात दाट धुके अनुभवायला मिळत आहे.

या कारणांनी अनेक ठिकाणी किमान तापमानात चढ उतार दिसून येत आहे. आज काही ठिकाणी तापमान कमी होऊन पुन्हा गारठा वाढला होता. आज पंजाबमधील अमृतसर येथे देशाच्या सपाट भूभागावरील नीचांकी २.८ अंश सेल्सिअस तापमानाची नोंद झाली.

राज्यातही अनेक ठिकाणी थंडी कमी जास्त होताना दिसत आहे. तसेच बऱ्याच भागात सकाळी धुक्याची चादर पाहायला मिळत आहे. राज्यात सकाळी थंडी जाणवत असली तरी किमान तापमान वाढलेलेच आहे. आज धुळे येथील कृषी महाविद्यालयात ९.२ अंश सेल्सिअस तापमानाची नोंद झाली. धुळे येथे राज्यातील सर्वात कमी तापमान होते. उर्वरित राज्यात किमान तापमान १५ अंशांच्या पुढे गेले आहे. सर्वात जास्त तापमान मुंबईतील सांताक्रज येथे ३५.४ अंश सेल्सिअस होते.

आज उत्तर महाराष्ट्र आणि मराठवाड्यात तुरळक ठिकाणी ढगाळ वातावरण राहून अगदी काही ठिकाणीच हलक्या पावसाची काहीशी शक्यताही हवामान विभागाने व्यक्त केली. तर पुढील २ ते ३ दिवसांमध्ये राज्यातील किमान तापमानात आणखी वाढ होईल, असाही अंदाज हवामान विभागाने व्यक्त केला.