Maharashtra Weather: ऐन थंडीत उन्हाचा चटका; राज्यातील किमान तापमानात काहीशी घट होण्याची शक्यता

Pune News: राज्यातील तापमानातील चढ उतार सुरुच आहेत. राज्यातील काही ठिकाणी कमाल तापमानाचा पारा ३४ अंशांच्या पुढे गेला आहे. त्यामुळे उन्हाचा चटका आणि उकाडा जाणवत आहे. आजपासून किमान तापमानात २ ते ३ अंशांची घट होण्याची शक्यता असल्याचे हवामान विभागाने स्पष्ट केले.

उत्तर भारतातील अनेक भागात आज तापमानात वाढ झाली. आज पंजाबमधील आदामपूर येथे देशाच्या सपाट भूभागावरील नीचांकी ५.३ अंश सेल्सिअस तापमानाची नोंद झाली. उत्तर गुजरात आणि परिसरावर ९०० मीटर उंचीवर चक्राकार वाऱ्यांची स्थिती आहे.

वायव्य भारतात १२.६ किलोमीटर उंचीपर्यंत १३० नॉट्स वेगाने पश्चिमेकडील जोरदार वाऱ्यांचे प्रवाह कायम आहेत. उत्तर भारतातील थंडी कमी जास्त होत आहे. तर काही भागात सकाळी धुक्याची चादर कायम आहे. 

राज्यातील ढगाळ हवामान आणि पावसाचे सावट दूर झा आहे. राज्याच्या अनेक भागात निरभ्र आकाश आहे. तर काही ठिकाणी सकाळी धुके आणि दव पडत आहेत. आज निफड येथील गहू संशोधन केंद्रात ११.९ अंश सेल्सिअस तापमानाची नोंद झाली होती.

उर्वरित राज्यात बहुतांश ठिकाणी किमान तापमान ११ ते २० अंशांच्या दरम्यान आहे. तर कमाल तापमानाचा पारा चांगलाच वाढला आहे. सोलापूरमध्ये सर्वाधिक ३६.३ अंश सेल्सिअस तापमनाची नोंद झाली होती.