Maharashtra Summer Heat: राज्यातील तापमानाचा पारा वाढतोय; सोलापुरात देशातील सर्वाधिक कमाल तापमानाची नोंद

Pune News: राज्यात दोन दिवसांपासून उन्हाचा पारा पुन्हा वाढला. राज्यातील अनेक ठिकाणी कमाल तापमान ३८ अंशाच्या दरम्यान पोचले. तर सोलापूर येथे देशातील सर्वाधिक ३९.४ अंश सेल्सिअस तापमानाची नोंद झाली होती. राज्यातील सकाळचे किमान तापमानही वाढते आहे. राज्यातील तापमानात आणखी वाढ होण्याचा अंदाज हवामान विभागाने दिला. 

देशातील इतर भागातही तापमानाचा पारा चढला आहे. उत्तर भारतातील थंडीही गायब होत आहे. आज देशातील सर्वात कमी तापमान १०.३ अंशावर पोचले. पंजाबमधील अमृतसर येथे या तापमानाची नोंद झाली.

तर सर्वाधिक ३९.४ अंश सेल्सिअस तापमान महाराष्ट्रात होते. सोलापूर येथे हे तापमान नोंदले गेले. उत्तर भारतातील बहुतांशी ठिकाणी तापमानात वाढ होत आहे. तसेच चंद्रपूर येथेही ३९ अंश सेल्सिस तापमानाची नोंद झाली. 

राज्यातील किमान तापमानात काहीसे चढ उतार सुरु आहेत. आज निफाड येथील गहू संशोधन केंद्रात सर्वात कमी ११.३ अंश सेल्सिअस तापमानाची नोंद झाली होती. तर सर्वाधिक तापमान सोलापुरात होते.

विदर्भात उन्हाचा चटका चांगलाच वाढला आहे. अकोला, ब्रम्हपुरी, जेऊर,मोहोळ, परभणी आणि सांगली येथे ३८ अंशापेक्षा अधिक तापमान होते. तर यवतमाळ, वर्धा, नागपूर, गडचिरोली, भंडारा आणि अमरावती तसेच बीड, कोल्हापूर, नांदेड, उदगीर येथे ३७ अंश तापमान होते.