Rain Alert: कोल्हापूर जिल्ह्यात हलक्या पावसाचा अंदाज; राज्यातील कमाल तापमानाचा पारा पुन्हा ३८ अंशाच्या पार पोचला

Pune News: राज्यातील तापमानात आज पुन्हा काहीशी वाढ झाली होती. तर कोकणातील रत्नागिरी आणि सिंधुदुर्ग जिल्ह्यात आजही दमट आणि उष्ण हवामानाचा इशारा म्हणजेच येलो अलर्ट कायम आहे. तर दक्षिण महाराष्ट्रातील काही भागात ढगाळ हवामानाच अंदाज असून कोल्हापूर जिल्ह्यात ढगांच्या गडगडाटासह हलक्या पावसाचा अंदाज हवामान विभागाने दिला.

विदर्भातील उन्हाचा चटका कायम आहे. विदर्भातील बहुतांशी ठिकाणी कमाल तापमानाचा पारा ३७ अंशाच्या पुढे होता. तसेच मध्य महाराष्ट्रातही आज तापमानात वाढ दिसून आली. आज सोलापूर येथे राज्यातील सर्वाधिक ३८.९ अंश सेल्सिअस तापमान होते.

राज्यात दिवस रात्रीच्या उकाड्यातही वाढ झाल्याचे दिसून आले. तसेच परभणी, जेऊर, अकोला, चंद्रपूर येथे तापमान ३८ अंशाच्या पुढे गेले. तर यवतमाळ, वर्धा, गडचिरोली, ब्रम्हपुरी, छत्रपती संभाजीनगर, कोल्हापूर, सांगली आणि सातारा येथे ३७ अंशावर तापमानाची नोंद झाली. 

याशिवाय आजही कोकणातील रत्नागिरी आणि सिंधुदुर्ग जिल्ह्यात दमट आणि उष्ण हवामानाचा येलो अलर्ट हवामान विभागाने दिला होता. तसेच कोल्हापूर जिल्ह्यात काही भागात ढगाळ हवामानाचा अंदाज आहे. तसेच कोल्हापूर जिल्ह्यात काही ठिकाणी ढगांच्या गडगडाटासह हलक्या पावसाचा अंदाजही हवामान विभागाने दिला.