Marathwada Rain: मराठवाड्यात पाऊस उघडीप देणार; राज्यात पावसाचा जोर पुढील ५ दिवस कमीच राहणार

Pune News: राज्यातील अनेक भागात मागील ५ दिवस जोरदार पाऊस झाला. मात्र आज सकाळपासूनच पावसाचा जोर कमी झाला होता. पुढील ५ दिवस राज्यात पावसाचा जोर कमीच राहण्याची शक्यता आहे. कोकण आणि विदर्भात काही ठिकाणी जोरदार पावसाची शक्यता आहे. मात्र मराठवाडा आणि मध्य महाराष्ट्रात पाऊस उघडीप देण्याची शक्यता आहे.

हवामान विभागाने आज रायगड जिल्ह्यात काही ठिकाणी जोरदार पावसाचा अंदाज दिला. तर कोल्हापूर, सातारा आणि पुणे जिल्ह्याच्या घाटमाथ्यावर जोरदार पावसाची शक्यता आहे. तर कोकण आणि मध्य महाराष्ट्रातील इतर जिल्हे, मराठवाडा आणि विदर्भातील सर्वच जिल्ह्यांमध्ये ढगाळ वातावरणासह काही ठिकाणी हलक्या ते मध्यम पावसाचा अंदाज आहे.

उद्या कोकणातील रत्नागिरी आणि रायगड तसेच विदर्भातील अमरावती, वर्धा, नागपूर, भंडारा आणि चंद्रपूर जिल्ह्यात काही ठिकाणी जोरदार पावसाचा अंदाज देण्यात आला. तर मध्य महाष्ट्रातील घाटमाथ्यावरही पावसाची शक्यता आहे. मराठवाडा, मध्य महाराष्ट्र आणि कोकणातील इतर जिल्ह्यांमध्ये ढगाळ वातावरणासह हलक्या ते मध्यम पावसाचा अंदाज हवामान विभागाने दिला.

बुधवारी विदर्भात पावसाचा जोर वाढण्याचा अंदाज आहे. विदर्भातील बुलडाणा, अकोला, अमरावती, वर्धा, वाशीम, यवतमाळ, भंडारा, गोंदीया आणि गडचिरोली जिल्ह्यात काही ठिकाणी जोरदार पावसाचा येलो अलर्ट देण्यात आला. तर मराठवाडा, मध्य महाराष्ट्र आणि कोकणात ढगाळ हवामानासह हलक्या ते मध्यम पावसाचा अंदाज हवामान विभागाने दिला.

गुरुवारी विदर्भातील काही जिल्ह्यांमध्ये पाऊस उघडीप देणार आहे. अमरावती, भंडारा, गोंदीया, चंद्रपूर आणि गडचिरोली जिल्ह्यात काही ठिकाणी जोरदार पावसाचा अंदाज आहे. तर विदर्भातील इतर जिल्हे, मराठवाड्यातील सर्व जिल्हे, मध्य महाराष्ट्रातली सर्व जिल्हे आणि कोकणातील सर्व जिल्ह्यांमध्ये ढगाळ हवामान राहून काही ठिकाणी हलक्या सरी पडतील, असा अंदाज हवामान विभागाने दिला.