Winter Update : विदर्भात गारठा वाढण्याची शक्यता

Pune News : उत्तर भारतात कडाक्याची थंडी कायम असल्याने महाराष्ट्रात गारठा वाढला आहे. राज्याच्या किमान तापमानात चढ-उतार सुरूच आहेत. सोमवारी (ता. १८) राज्याच्या अनेक भागात गारठा कायम होता. नाशिकच्या निफाड येथील गहू संशोधन केंद्रात राज्यातील नीचांकी ११.२ अंश सेल्सिअस किमान तापमानाची नोंद झाली. पुढील दोन दिवसांत विदर्भात गारठा वाढण्याची शक्यता आहे.

सोमवारी (ता. १८) पंजाबच्या अमृतसर येथे देशाच्या सपाट भूभागावरील नीचांकी ३.५ अंश सेल्सिअस तापमानाची नोंद झाली आहे. पंजाब, हरियाणा, चंडीगड, दिल्ली, उत्तर प्रदेश, राजस्थानचा काही भाग, पूर्व मध्य प्रदेश, उत्तर छत्तीसगडमध्ये अनेक भागांत किमान तापमान ५ ते १० अंशांच्या दरम्यान आहे.

पंजाबमध्ये दाट धुके पाहायला मिळत आहे. राज्याच्या किमान तापमानातही घट कायम असल्याने विदर्भ, मराठवाडा, मध्य महाराष्ट्रात थंडी कायम आहे. तर सायंकाळनंतर जोरदार थंड वारे वाहत असल्याने गारठा आणखी वाढत आहे.

विदर्भ आणि उत्तर महाराष्ट्रात अनेक ठिकाणी तापमानाचा पारा १४ अंशांच्या खाली आहे. राज्याच्या उत्तरेकडील भागात गारठा अधिक असून, दक्षिणेकडील जिल्ह्यात मात्र किमान तापमान अद्यापही १५ अंशांच्या वरच आहे. पुढील दोन दिवसांत राज्याच्या किमान तापमानात २ ते ३ अंशांची घट होण्याची, तसेच विदर्भात गारठा वाढण्याची शक्यता हवामान विभागाने वर्तविली आहे.

सोमवारी (ता. १८) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे २७.३ (१४.५), जळगाव २८.० (१४.४), कोल्हापूर २६.१ (१९.१), महाबळेश्वर २३.९ (१३.५), नाशिक २६.३ (१४.२), निफाड २८.० (११.४), सांगली २६.२ (१८.९), सातारा २७.९ (१८.५), सोलापूर २८.९(१९.८), सांताक्रूझ ३३.२ (२३.६), डहाणू ३१.४ (२०.८), रत्नागिरी ३३.५ (२५.६),

छत्रपती संभाजीनगर २७.० (१५.४), नांदेड - (१७.२), परभणी २७.५ (१५.९), अकोला २९.२ (१५.३), अमरावती २७.४ (१४.९), बुलडाणा २६.८ (१४.०), ब्रह्मपुरी ३०.० (१३.६), चंद्रपूर २८.६(१३.०), गडचिरोली २८.८ (१२.०), गोंदिया २६.४ (१२.५), नागपूर २७.६(१२.८), वर्धा २८.०(१३.६), वाशीम २७.८ (१२.८), यवतमाळ २९.० (१३.०).