Monsoon Rain Update: माॅन्सूनची वाटचाल ‘जैसे थे’च; राज्यात पावसाचा जोर ५ दिवसांपासून कमीच

Pune News: माॅन्सूनच्या वाटचालीसाठी पोषक हवामान नाही. त्यामुळे माॅन्सून गेल्या ६ दिवसांपासून एकाच भागात मुक्कामावर आहे. माॅन्सूनचे प्रवाह मंदावल्याने राज्यात पावसाचा जोरही कमी झाला. पुढील ५ दिवस राज्यातील काही भागात हलक्या ते मध्यम पावसाचा अंदाज हवामान विभागाने दिला.

राज्यात माॅन्सून गेल्या ६ दिवसांपासून एकाच भागत आहे. माॅन्सूनचे प्रवाह मंदावले आहेत. त्यामुळे माॅन्सूनमध्ये प्रगती नाही. माॅन्सून राज्यात मुंबई, अहिल्यानगर, बीड, नांदेड, परभणी, हिंगोली, यवतमाळ, चंद्रपूर आणि गडचिरोली जिल्ह्यापर्यंत पोचला आहे. त्यानंतर माॅन्सून पुढे सरकलाच नाही.

माॅन्सूनची सिमा आजही मुंबई, अहिल्यानगर, अदिलाबाद, भवानीपटना, पुरी आणि बालूरघाट भागात होती. माॅन्सूनची वाटचाल कधी सुरु होईल, याविषयी हवामान विभागाने माहीती दिलेली नाही.

माॅन्सूनचे प्रवाह मंदावल्याने राज्यात पावसाचा जोरही कमी झाला. मागील ५ दिवस राज्यात काही ठिकाणी हलक्या ते मध्यम सरी पडल्या आहेत. जोरदार सर्वदूर पावसाचीन नोंद झाली नाही. असे असले तरी राज्यात पुढील ५ दिवस काही भागात हलक्या ते मध्यम पावसाचा अंदाज आहे. विदर्भातील काही जिल्ह्यांमध्ये पुढील ३ दिवस काही ठिकाणी जोरदार पावसाचा अंदाज आहे. बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदीया, चंद्रपूर आणि गडचिरोली जिल्ह्यात काही ठिकाणी हलक्या ते मध्यम पावसाचा अंदाज आहे.

मराठवाड्यातील सर्वच जिल्ह्यांमध्ये पुढील ५ दिवस हलक्या पावसाचा अंदाज आहे. काही ठिकाणी जोरदार सरींचीही शक्यता आहे. मध्य महाराष्ट्रातही पावसाचा जोर कमीच राहण्याची शक्यता आहे. कोकणातही काही ठिकाणी हलक्या ते मध्यम पावसाचा अंदाज आहे. तर राज्यात काही ठिकाणी मात्र जोरदार सरी पडू शकतात, असाही अंदाज हवामान विभागाने दिला.