Monsoon Update: मॉन्सून कोकणात दाखल; पुढील दोन दिवसात महाराष्ट्राच्या आणखी काही भागात मजल मारणार

Monsoon Arrived In Konkan : नैऋत्य मोसमी वारे म्हणजेच मॉन्सूनची वाटचाल सुरूच आहे. रविवारी (ता. ११) मॉन्सून कोकणात डेरेदाखल झाल्याचे हवामानशास्त्र विभागानं जाहीर केलं आहे. पुढील दोन दिवसात मॉन्सून महाराष्ट्राच्या उर्वरित काही भागात मजल मारेल, असा अंदाज हवामानशास्त्र विभागाने वर्तवला आहे.

रविवारी मॉन्सूननं अरबी समुद्र, कर्नाटकचा काही भाग, गोवा, कोकणाचा काही भाग, तामिळनाडू आणि पुड्डेचेरीचा बहुतांश भाग, आंध्रप्रदेशाचा काही भाग, पश्चिममध्य आणि नैऋत्य बंगालच्या उपसागराचा काही भाग, ईशान्य बंगालच्या उपसागराचा काही भाग व्यापला आहे.

पुढील ४८ तास मॉन्सूनच्या वाटचालीस पोषक स्थिती निर्माण झाली आहे. पुढील ४८ तासात मॉन्सून अरबी समुद्राचा काही भाग, कर्नाटक आणि महाराष्ट्राचा काही भाग, तामिळनाडूचा उर्वरित भाग, आंध्रप्रदेशचा काही भाग, दक्षिणमध्य आणि वायव्य बंगालचा उपसागर, ईशान्य भागातील काही राज्य, उप हिमालय, पश्चिम बंगाल सिक्कीम आणि बिहार राज्यात मजल मारण्याचे संकेत हवामानशास्त्र विभागानं दिले आहेत.

देशात दाखल होण्यासाठी माॅन्सूनने यंदा आठ दिवस उशीर केला. माॅन्सूनच्या केरळ आगमनाची सर्वसाधारण तारीख एक जून असते. त्यानंतर दरवर्षी सर्वसाधारण ७ जूनला मॉन्सून तळकोकणात दाखल होतो.

परंतु यंदा मॉन्सून केरळमध्ये ८ जूनला दाखल झाला. त्यामुळे केरळात ८ दिवस उशिरा पोचला तर सर्वसाधारण तारखेच्या ५ दिवस उशिरानं मॉन्सून कोकणात दाखल झाला.