Monsoon 2025 : मॉन्सूनने देश व्यापला

Pune News : नैॡत्य मोसमी वाऱ्यांनी (मॉन्सून) रविवारी (ता. २९) राजस्थान, उत्तर प्रदेश, हरियानाचा उर्वरित भाग आणि दिल्लीसह संपूर्ण देश व्यापला आहे. यंदा केरळ आणि महाराष्ट्रात विक्रमी वेगाने दाखल होणाऱ्या मॉन्सूनने सर्वसाधारण वेळेच्या नऊ दिवस आधीच संपूर्ण देश आपल्या अधिपत्याखाली घेतला आहे.

यंदा २४ मे रोजी मॉन्सून केरळसह कर्नाटक किनारपट्टीवर दाखल झाला. २५ मे मॉन्सूनने तळ कोकणातील सिंधुदुर्ग जिल्ह्याच्या देवगडपर्यंत धडक धडक दिली. १९९० नंतर प्रथमच मॉन्सून इतक्या लवकर महाराष्ट्रात धडकला. २६ मे रोजी मुंबईसह पुणे, धाराशीवपर्यंत मॉन्सून पोहोचला होता. तर २८ मे रोजी मॉन्सूनने पुढे चाल करत मध्य महाराष्ट्र, मराठवाड्याच्या आणखी काही भागासह विदर्भात प्रगती केली.

आगमनाचा वेग पाहता यंदा मॉन्सून संपूर्ण महाराष्ट्रात लवकर पोहोचला असे वाटत असतानाच मॉन्सूनची चाल थबकली. मुंबई, अहिल्यानगरसह बीड, परभणी, हिंगोली, नांदेड, यवतमाळ, चंद्रपूर, गडचिरोली जिल्ह्यांच्या काही भागापर्यंत मजल मारल्यानंतर मात्र अरबी समुद्रावरून मॉन्सूनची वाटचाल थांबली होती.

तब्बल तीन आठवड्यानंतर १६ जून रोजी मॉन्सूनने पुन्हा सक्रिय होत विदर्भाचा उत्तर भाग वगळता उर्वरित महाराष्ट्रासह गुजरात, मध्य प्रदेशचा काही भाग, छत्तीसगड ओडिशाच्या आणखी काही भागत प्रगती केली. साधारणतः १५ जून पर्यंत राज्य व्यापणारा मॉन्सून यंदा १७ जून रोजी संपूर्ण महाराष्ट्रात दाखल झाला होता.

त्यानंतर मॉन्सूनने मजल दरमजल प्रवास सुरूच ठेवला. १२ दिवसांत मॉन्सूनने उर्वरित देशात मजल मारली. देशभरात मॉन्सून दाखल झाल्याने मॉन्सूनचा आस असलेला कमी दाबाचा पट्टा पंजाबच्या फिरोजपूर, सोनीपत, अयोध्या, गया, पुरुलिया, पश्चिम बंगालच्या किनाऱ्यावरील कमी दाबाचे केंद्र ते आग्नेय बंगालच्या उपसागरापर्यंत विस्तारला आहे. आता महाराष्ट्रासह संपूर्ण देशात जोरदार पावसाची प्रतीक्षा आहे.