Agriculture Tips: महाराष्ट्रावरील हवेच्या दाबात आजपासून शनिवारपर्यंत (ता.३ ते ८) १००६ हेप्टापास्कल पर्यंत वाढ होत असल्याने पावसात बराच काळ उघडीप, तर तुरळक ठिकाणी पावसाची शक्यता राहील. पालघर, नाशिक, धुळे, नंदुरबार, लातूर, बीड व सांगली जिल्ह्यांत वाऱ्याचा ताशी वेग १५ ते १८ कि.मी. पर्यंत वाढेल.
सर्वच जिल्ह्यात आकाश अंशतः ढगाळ राहील. पश्‍चिम विदर्भातील बुलडाणा, अकोला, वाशीम व अमरावती तसेच मध्य विदर्भातील यवतमाळ, वर्धा व नागपूर जिल्ह्यांत वाऱ्याची दिशा वायव्येकडून राहील. त्यामुळे पावसाचे प्रमाण अल्प राहील. सकाळची व दुपारची सापेक्ष आर्द्रता योग्य प्रमाणात राहील.
पिकांच्या योग्य वाढीसाठी पुरेशा सूर्यप्रकाश तसेच योग्य कमाल व किमान तापमानाची आवश्यकता असते. पावसात उघडीप मिळताच खरीप पिकांमध्ये कोळपणी व खुरपणीची कामे करून घ्यावीत. जेणेकरून तणांचा प्रादुर्भाव वेळीच नियंत्रित केला जाईल.
प्रशांत महासागराच्या विषुववृत्तीय भागात इक्वेडोरजवळ पाण्याच्या पृष्ठभागाचे तापमान २१ अंश सेल्सिअसपर्यंत कमी राहील. त्यामुळे हवेचे दाब अधिक राहतील. तर हिंदी महासागराच्या पाण्याच्या पृष्ठभागाचे तापमान ३० अंश सेल्सिअसपर्यंत अधिक राहण्यामुळे बाष्पीभवनाचा वेग कायम राहील. त्यातूनच बाष्पनिर्मिती मोठ्या प्रमाणात होऊन ढगनिर्मिती होईल. त्यामुळे ऑगस्ट महिन्यात पावसाचे प्रमाण चांगले राहील.
कोकण
आज (ता.३) सिंधुदुर्ग व रत्नागिरी जिल्ह्यांत १० मि.मी., ठाणे जिल्ह्यात १२ मि. मी., रायगड जिल्ह्यात ८ मि.मी., तर पालघर जिल्ह्यात ६ मि.मी. पावसाची शक्यता आहे. कोकणातील सर्वच जिल्ह्यांत वाऱ्याची दिशा नैॡत्येकडून राहील. वाऱ्याचा ताशी वेग सिंधुदुर्ग व रत्नागिरी जिल्ह्यांत ताशी ८ ते ९ कि.मी., तर रायगड व ठाणे जिल्ह्यांत ताशी ११ कि.मी. राहील. मात्र पालघर जिल्ह्यात वाऱ्याच्या ताशी वेगात वाढ होऊन तो ताशी १६ कि.मी. राहील.
सर्वच जिल्ह्यांत कमाल तापमान ३३ अंश सेल्सिअस राहील. किमान तापमान सिंधुदुर्ग जिल्ह्यात २३ अंश सेल्सिअस, रत्नागिरी जिल्ह्यात २६ अंश सेल्सिअस, रायगड, ठाणे व पालघर जिल्ह्यांत २७ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सर्वच जिल्ह्यांत सकाळची सापेक्ष आर्द्रता ८३ ते ८७ टक्के, दुपारची सापेक्ष आर्द्रता ८१ ते ८३ टक्के राहील.
उत्तर महाराष्ट्र
आज (ता.३) नाशिक जिल्ह्यात ९ मि.मी., तर धुळे, नंदुरबार व जळगाव जिल्ह्यांत २ ते ३ मि.मी. पावसाची शक्यता आहे. सर्वच जिल्ह्यात वाऱ्याची दिशा नैॡत्येकडून राहील. वाऱ्याचा ताशी वेग नाशिक जिल्ह्यात ताशी १८ कि.मी., तर धुळे व नंदुरबार जिल्ह्यांत ताशी १६ कि.मी. आणि जळगाव जिल्ह्यात ताशी ११ कि.मी. राहील.
सर्वच जिल्ह्यांत कमाल तापमान ३० अंश सेल्सिअस राहील. किमान तापमान जळगाव जिल्ह्यात २३ अंश सेल्सिअस, तर नाशिक जिल्ह्यात २५ अंश सेल्सिअस राहील. धुळे व नंदुरबार जिल्ह्यांत किमान तापमान २६ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सर्वच जिल्ह्यांत सकाळची सापेक्ष आर्द्रता ८३ ते ८९ टक्के, तर दुपारची सापेक्ष आर्द्रता ५७ ते ७३ टक्के राहील.
मराठवाडा
आज (ता.३) नांदेड जिल्ह्यात ५ मि.मी., तर धाराशिव, बीड व जालना जिल्ह्यांत ४ मि.मी. पावसाची शक्यता आहे. हिंगोली, परभणी व छत्रपती संभाजीनगर जिल्ह्यांत आज ३ मि.मी., तर लातूर जिल्ह्यात ७ मि.मी. पावसाची शक्यता आहे. बराच काळ पावसात उघडीप, तर तुरळक ठिकाणी पावसाची शक्यता राहील. धाराशिव, लातूर, बीड, परभणी, हिंगोली, जालना व छत्रपती संभाजीनगर जिल्ह्यांत वाऱ्याची दिशा नैॡत्येकडून राहील. तर नांदेड जिल्ह्यात वाऱ्याची दिशा वायव्येकडून राहील. वाऱ्याचा ताशी वेग छत्रपती संभाजीनगर जिल्ह्यात ताशी १२ किमी, जालना जिल्ह्यात ताशी १३ कि.मी. राहील.
कमाल तापमान जालना व छत्रपती संभाजीनगर जिल्ह्यांत ३१ अंश सेल्सिअस, तर धाराशिव जिल्ह्यात ३२ अंश सेल्सिअस राहील. कमाल तापमान लातूर जिल्ह्यात ३३ अंश सेल्सिअस, बीड जिल्ह्यात ३४ अंश सेल्सिअस राहील. किमान तापमान नांदेड, परभणी, हिंगोली, जालना व छत्रपती संभाजीनगर जिल्ह्यांत २४ अंश सेल्सिअस इतके राहील. तर बीड जिल्ह्यात किमान तापमान २५ अंश सेल्सिअस इतके राहील. सर्वच जिल्ह्यात हवामान ढगाळ राहील. सकाळची सापेक्ष आर्द्रता ८४ ते ९२ टक्के, तर दुपारची सापेक्ष आर्द्रता ६० ते ७४ टक्के राहील.
पश्‍चिम विदर्भ
आज (ता.३) बुलडाणा व अकोला जिल्ह्यांत १ मि.मी., तर वाशीम व अमरावती जिल्ह्यात २ मि.मी. पावसाची शक्यता आहे. वाऱ्याची दिशा बुलडाणा व अकोला जिल्ह्यांत नैॡत्येकडून, तर वाशीम व अमरावती जिल्ह्यांत वायव्येकडून राहील. सर्वच जिल्ह्यांत वाऱ्याचा ताशी वेग १४ कि.मी. राहील.
कमाल तापमान बुलडाणा, वाशीम व अमरावती जिल्ह्यांत ३१ अंश सेल्सिअस, तर अकोला जिल्ह्यात ३२ अंश सेल्सिअस राहील. बुलडाणा व वाशीम जिल्ह्यांत किमान तापमान २३ अंश सेल्सिअस, तर अकोला व अमरावती जिल्ह्यांत २४ अंश सेल्सिअस राहील. आकाश अंशतः ढगाळ राहील. सर्वच जिल्ह्यात सकाळची सापेक्ष आर्द्रता ८४ ते ८७ टक्के, तर दुपारची सापेक्ष आर्द्रता ५५ ते ६० टक्के राहील.
मध्य विदर्भ
आज (ता.३) यवतमाळ व वर्धा जिल्ह्यांत १ मि.मी., नागपूर जिल्ह्यात २ मि.मी. पावसाची शक्यता आहे. वाऱ्याची दिशा यवतमाळ व नागपूर जिल्ह्यांत वायव्येकडून, तर वर्धा जिल्ह्यात नैॡत्येकडून राहील. सर्वच जिल्ह्यात वाऱ्याचा ताशी वेग ११ ते १४ कि.मी. राहील.
कमाल तापमान यवतमाळ, वर्धा व नागपूर जिल्ह्यांत ३२ अंश सेल्सिअस राहील. किमान तापमान सर्वच जिल्ह्यांत २५ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सकाळची सापेक्ष आर्द्रता ८४ ते ८७ टक्के, तर दुपारची सापेक्ष आर्द्रता ५७ ते ६० टक्के इतकी राहील.
पूर्व विदर्भ
आज (ता.३) चंद्रपूर जिल्ह्यात १ मि.मी., तर गडचिरोली जिल्ह्यात २ मि.मी. भंडारा आणि गोंदिया जिल्ह्यांत ३ मि.मी. पावसाची शक्यता राहील. चंद्रपूर, गडचिरोली व गोंदिया जिल्ह्यांत वाऱ्याची दिशा नैॡत्येकडून, तर भंडारा जिल्ह्यात वायव्येकडून राहील. वाऱ्याचा ताशी वेग गडचिरोली जिल्ह्यात ताशी ५ कि.मी., तर गोंदिया जिल्ह्यात ताशी १० कि.मी. राहील.
कमाल तापमान चंद्रपूर, गडचिरोली व भंडारा जिल्ह्यांत ३१ अंश सेल्सिअस, तर गोंदिया जिल्ह्यात ३२ अंश सेल्सिअस राहील. किमान तापमान गोंदिया जिल्ह्यात २४ अंश सेल्सिअस, तर गडचिरोली व भंडारा जिल्ह्यांत २५ अंश सेल्सिअस आणि चंद्रपूर जिल्ह्यात २६ अंश सेल्सिअस राहील. सर्वच जिल्ह्यात आकाश अंशतः ढगाळ राहील. सर्वच जिल्ह्यांत सकाळची सापेक्ष आर्द्रता ८५ ते ९० टक्के, तर दुपारची सापेक्ष आर्द्रता ६० ते ६१ टक्के राहील.
पश्‍चिम महाराष्ट्र
आज (ता.३) कोल्हापूर जिल्ह्यात १५ मि.मी., सातारा व पुणे जिल्ह्यांत ९ ते १० मि.मी., तर सांगली, सोलापूर व अहिल्यानगर जिल्ह्यांत ४ मि.मी. पावसाची शक्यता आहे. सर्वच जिल्ह्यात वाऱ्याची दिशा नैॡत्येकडून राहील. वाऱ्याचा ताशी वेग सांगली व अहिल्यानगर जिल्ह्यांत ताशी १६ कि.मी., तर सोलापूर व पुणे जिल्ह्यांत ताशी १३ व १४ कि.मी. राहील. तसेच कोल्हापूर व सातारा जिल्ह्यांत वाऱ्याचा ताशी वेग ११ कि.मी. राहील.
कमाल तापमान कोल्हापूर जिल्ह्यात २८ अंश सेल्सिअस, तर सांगली व सातारा जिल्ह्यांत ३२ अंश सेल्सिअस राहील. तर पुणे व अहिल्यानगर जिल्ह्यांत कमाल तापमान ३३ अंश सेल्सिअस आणि सोलापूर जिल्ह्यात ३४ अंश सेल्सिअस राहील. किमान तापमान कोल्हापूर जिल्ह्यात २१ अंश सेल्सिअस, सांगली व सातारा जिल्ह्यांत २२ अंश सेल्सिअस इतके राहील. तर पुणे व अहिल्यानगर जिल्ह्यांत किमान तापमान २३ अंश सेल्सिअस व सोलापूर जिल्ह्यात २५ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सर्वच जिल्ह्यांत सकाळची सापेक्ष आर्द्रता ८४ ते ९३ टक्के, तर दुपारची सापेक्ष आर्द्रता ६० ते ७४ टक्के राहील.
कृषी सल्ला
पावसात उघडीप मिळताच कोळपणी व खुरपणीची कामे करून तण नियंत्रण करावे.
सोयाबीन पिकावरील स्पोडोप्टेरा किडीचा प्रादुर्भाव ओळखून नियंत्रण करावे.
ज्वारी व बाजरी पीक २१ दिवसांचे झाल्यानंतर नत्राचा दुसरा हप्ता द्यावा.
भात पिकात पुनर्लागवडीनंतर पहिल्या ३० दिवसांपर्यत शेतात पाण्याची पातळी २.५ ते ५ सेंमीपर्यंत नियंत्रित ठेवावी. भात लागवडीतील पावसाच्या अतिरीक्त पाण्याचा निचरा होण्याची व्यवस्था करावी.
मका पीक एक महिन्याचे झाल्यावर २५ टक्के नत्राचा दुसरा हप्ता द्यावा. शेतात पक्षी थांबे उभारावेत.
जनावरांस लम्पी त्वचा आजाराचे प्रतिबंधात्मक लसीकरण करून घ्यावे. आजारी जनावरांची रोगप्रतिकारक शक्ती वाढविण्यासाठी समतोल आहार द्यावा.
(ज्येष्ठ कृषी हवामान तज्ज्ञ, सदस्य, ॲग्रिकल्चर मेटरॉलॉजी फोरम फॉर साउथ आशिया)
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
