Monsoon 2023: पावसाने ११ जिल्ह्यांना झोडपले; काही जिल्ह्यांमध्ये जोरदार पावसाचा अंदाज

Maharashtra Latest Rain Update : राज्याच्या काही भागात आज पावसाचा जोर कमी झाला होता. तर काही ठिकाणी जोरदार पावसाने हजेरी लावली. कोकण आणि घाटमाथ्यावर पावसाचा जोर अधिक होता. मराठवाडा आणि खानदेशात बहुतांशी ठिकाणी आज पावसाची उघडीप पाहायला मिळाली. हवामान विभागाने आजही राज्यातील ११ जिल्ह्यांमध्ये जोरदार पावसाचा ऑरेंज अलर्ट जारी केला.

राज्यातील अनेक भागात आज जोरदार पाऊस झाला. तर बहुतांशी भागांमध्ये हलक्या ते मध्यम स्वरुपाच्या सरी पडल्या. काही भागांमध्ये मात्र केवळ ढगाळ वातावरण पाहायला मिळाले. कोकण, मध्य महाराष्ट्र, खानदेश, मराठवाडा आणि विदर्भातील काही भागात आजही मुसळधार पाऊस झाला. कोकणतील रायगड, रत्नागिरी, मुंबई, पालघर आणि ठाणे जिल्ह्यात पावसाची संततधार काही तास सुरु होती. पुणे आणि सातारा जिल्ह्यातही बहुतांशी ठिकाणी पावसाचा जोर पाहायला मिळाला.

पूर्व विदर्भातील चंद्रपूर, गडचिरोली, भंडारा आणि गोंदीया जिल्ह्यातही अनेक भागात जोरदार पाऊस पडला. मराठवड्यातही ठिकठिकाणी मुसळधार पावसाने हजेरी लावली. खानदेशातही अनेक भागात हीच स्थिती राहीली. पण मराठवाड्यातील अनेक जिल्ह्यांमध्ये आज पावसाचा जोर कमीच होता. बहुतांश ठिकाणी ढगाळ वातावरणासह हलक्या सरी पडत होत्या.

हवामान विभागाने आज राज्यातील ११ जिल्ह्यांमध्ये जोरदार पावसाचा ऑरेंज अलर्ट जारी केला. कोकणातील रत्नागिरी, रायगड, पालघर ठाणे आणि मुंबई जिल्ह्यात बहुतांशी ठिकाणी जोरदार पावसाचा अंदाज व्यक्त केला. मध्य महाराष्ट्रातील पुणे आणि सातारा जिल्ह्यातही जोरदार पावसाचा बहुतांशी ठिकाणी अंदाज दिला. पूर्व विदर्भातील चंद्रपूर, गडचिरोली, भंडारा आणि गोंदीया जिल्ह्यातही बहुतांशी ठिकाणी जोरदार पावसाचा ऑरेंज अलर्ट जारी केला.

तसेच सिंधुदुर्ग, कोल्हापूर, नाशिक जिल्ह्यासह विदर्भातील बुलडाणा, वाशीम, अकोला, अमरावती, यवतमाळ, वर्धा आणि नागपूर जिल्ह्यात तसेच मराठवाड्यातील हिंगोली जिल्ह्यातील काही ठिकाणी जोरदार पावसाचा येलो अलर्ट जारी केला. यासोबतच मराठवाडा आणि खानदेशातही ठिकठिकाणी हलक्या ते मध्यम स्वरुपाच्या सरी पडतील, असा अंदाज जारी केला.