Hawaman Andaj: थंडी राज्यातून कायमची गेली का? राज्यातील बहुतांशी भागात किमान तापनातही वाढ

Pune News: यंदा फेब्रुवारी महिन्यात उष्णता मोठ्या प्रमाणात वाढली. किमान आणि कमाल तापमानातील तफावतही मोठी आहे. आज निफाडे येथील गहू संशोधन केंद्रात १०.६ अंश सेल्सिअसची नोंद झाली होती. तर सोलापूर येथे कमाल ३८.१ अंश सेल्सिअस तापमान होते. राज्यातील तापमानात आणखी वाढ होऊ शकते, असा अंदाज हवामान विभागाने दिला. 

फेब्रुवारी महिन्यातील उष्णता असह्य होत आहे. राज्यातील कमी थंडी वाढलेल्या उष्णतेविषयी हवामान विभागाचे निवृत्त शास्त्रज्ञ माणिकराव खुळे यांनी सांगितले की,  महाराष्ट्रावर वारा-वहनाच्या पॅटर्नमध्ये काहीही बदल झाला नाही. तो आहे तसाच टिकून राहिला.

त्यामुळे महाराष्ट्रावर हवेच्या उच्च दाबातून, प्रत्यावर्ती चक्रीय वाऱ्यामुळे उत्तरेतील थंड वाऱ्यांना भिंतीसारखा अटकाव तयार झाला. पर्यायाने उत्तरेतील थंड वारे महाराष्ट्रात पोहचलेच नाही . त्यामुळे काहीसे निरभ्र आकाश असूनही जानेवारीच्या शेवटच्या आठवड्यापासून विशेष अशी थंडी आतापर्यंत महाराष्ट्रात जाणवली नाही. जी काही जाणवली ती चढ उतारासह केवळ किरकोळ अशीच थंडी जाणवली. 

मग आता थंडी गायबच झाली असे समजावे काय? याविषी श्री खुळे म्हणाले की, फेब्रुवारीच्या शेवटच्या आठवड्यात चमत्कारीकपणे हवेच्या दाबात आणि वारा वहन प्रणालीत जर अजूनही एकाकी काही बदल झाला तरच किमान तापमानाचा पारा खालावून थंडीची अपेक्षा करता येईल. अन्यथा नाही. विशेषतः उत्तर महाराष्ट्रातील नंदुरबार, धुळे, जळगाव, नाशिक, उत्तर पुणे, उत्तर नगर, व उत्तर छत्रपती संभाजीनगर जिल्ह्यात २३ ते २५ फेब्रुवारी दरम्यान पहाटे काहीसा गारवा जाणवण्याची शक्यताही नाकारता येत नाही, असाही अंदाज खुळे यांनी व्यक्त केला.

तसेच बंगालच्या खाडीतील सध्याच्या प्रत्यावर्ती चक्रीय वाऱ्यामुळे केवळ फक्त विदर्भातच आज आणि उद्या ढगाळ वातावरण राहून झालाच तर अगदीच तुरळक ठिकाणी नगण्य पावसाची शक्यता जाणवते, असेही खुळे यांनी स्पष्ट केले.