Weather Update : राज्याच्या तापमानात चढ-उतार शक्य

Pune News : राज्यातील ढगाळ हवामान निवळताच उन्हाचा चटका आणि उकाडा चांगलाच वाढला आहे. तर किमान तापमानात चढ-उतार होत आहेत. आज (ता. २०) किमान मध्य महाराष्ट्राच्या किमान तापमानात घट होण्याचा तर उर्वरित राज्यात तापमानातील वाढ कायम राहण्याचा अंदाज हवामान विभागाने वर्तविला आहे.

उत्तर भारतात थंडी निवळली असून, बिहारच्या मोतीहारी येथे देशाच्या सपाट भूभागावरील नीचांकी ९.५ अंश सेल्सिअस तापमान नोंदले गेले. उत्तर भारतात १५५ नॉट्स वेगाने जोरदार वारे वाहण्याची शक्यता आहे. यामुळे उत्तर भारतात विजांसह पाऊस, गारपिटीचा इशारा देण्यात आला आहे.

राज्यात उन्हाचा चटका वाढल्याने झळा आणि उकाडा तापदायक ठरत आहे. सोमवारी (ता. १९) अकोला येथे राज्यातील उच्चांकी ३६.८ अंश सेल्सिअस तापमानाची नोंद झाली. राज्यात बऱ्याच ठिकाणी कमाल तापमान ३५ अंशांच्या, तर काही ठिकाणी ३६ अंशांच्या वर गेले आहे.

उत्तर महाराष्ट्रात किमान तापमानात घट होत निफाड, धुळे येथे तापमान पुन्हा ११ अंशांच्या जवळपास आले आहे. आज (ता. २०) उन्हाचा चटका, उकाडा कायम राहणार असला तरी किमान तापमानात घट होण्याची शक्यता आहे.

सोमवारी (ता. १९) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३५.१ (१४.७), धुळे ३५.५ (११.५), जळगाव ३६.२ (१५.३), कोल्हापूर ३४.६ (१९.७), महाबळेश्वर २९.५ (१६.१), मालेगाव ३६.२ (१७.२), नाशिक ३४.३ (१४.०), निफाड ३२.० (१०.६), सांगली ३५.६ (१९.२), सातारा ३४.६ (१५.८), सोलापूर (२०.५), सांताक्रूझ ३४.३ (१९.५), डहाणू ३२.१ (१७.९), रत्नागिरी ३२.१ (१९.९),

छत्रपती संभाजीनगर ३४.२ (१९.२), नांदेड ३५.८ (१९.८), परभणी ३६.५ (१८.७), अकोला ३६.८ (१९.१), अमरावती ३४.६ (२०.५), बुलडाणा ३४.५ (१९.०), ब्रह्मपुरी ३५.२ (१८.६), चंद्रपूर ३४.४ (१८.६), गडचिरोली ३२.६ (१७.०), गोंदिया ३२.८ (१८.१), नागपूर ३४.५(१९.०), वर्धा ३५.०(१९.६), वाशीम ३३.६ (१७.०), यवतमाळ ३६.२ (१९.०).