Maharashtra Cold Weather : थंडी वाढण्याची प्रतिक्षा कायम; राज्यातील बहुतांशी भागात तापमानातील चढ उतारही कायम

Pune News : राज्यातील थंडी अद्यापही कमीच आहे. सकाळच्या वेळी काही भागात धुके आणि ढगाळ वातावरणामुळे थंडी गायब झाली आहे. उत्तर भारतातही थंडी कमी झालेली दिसते. यामुळे राज्यात किमान तापमान अधिक आहे.

पुढील काही दिवसांमध्ये राज्यात पुन्हा थंडी जाणवायला सुरुवात होईल, असा अंदाज हवामान विभागाने दिला.

उत्तर भारतात थंडी कमी झालेली आहे. तर अनेक भागात किमान तापमानात चढ उतार सुरु आहेत. उत्तर भारतातील थंडीची लाटही सध्या नाही. आज हरियानातील हिस्सार येथे देशाच्या सपाट भूभागावरील नीचांकी ४.८ अंश सेल्सिअस तापमानाची नोंद झाली. तर केरळमधील कन्नूर येथे देशातील सर्वाधिक ३७.४ अंश सेल्सिअस तापमानाची नोंद झाली होती. 

राज्यातील काही भागात आजही अंशतः ढगाळ वातावरण होते. तर काही भागात सकाळी वातावणात धुक्याची चादर दिसून येत आहे. तसेच उत्तर भारतातून थंडी वाऱ्यांचे प्रवाह खंडीत झाले आहेत.

या कारणांनी राज्यातील थंडी कमीच आहे. राज्यात थंडी वाढण्याला काही दिवसांची वाट पाहावी लागू शकते. तर पुढील काही दिवस राज्यातील तापमानात चढ उतार राहू शकतात, असा अंदाज हवामान विभागाने दिला.