Weather Update : दक्षिण महाराष्ट्रात उद्यापासून पावसाची शक्यता

Pune News : राज्याच्या तापमानात चढ-उतार होत असल्याने थंडी कमी झाली आहे. यातच पावसला पोषक हवामान होत असून, उद्यापासून (ता. २३) महाराष्ट्राच्या दक्षिणेकडील जिल्ह्यात जोरदार वारे, विजांसह पावसाचा अंदाज हवामान विभागाने दिला आहे. आज (ता. २२) राज्यात ढगाळ हवामानासह किमान तापमानात वाढ होण्याचा अंदाज हवामान विभागाने वर्तविला आहे.

भारताच्या दक्षिणेकडील कोमोरीन भागापासून आंध्र प्रदेशच्या किनाऱ्यापर्यंत हवेचा कमी दाबाचा पट्टा तयार झाला आहे. कोमोरिन भागावर असलेली चक्राकार वाऱ्यांची स्थिती तसेच तामिळनाडूच्या किनाऱ्यालगत चक्राकार वाऱ्यांची स्थिती वरील कमी दाबाच्या पट्ट्यात विरून गेली आहे.

यातच राज्यात पावसाला पोषक हवामान होत आहे. गुरूवारी (ता. २३) सिंधुदुर्ग, कोल्हापूर आणि सांगली जिल्ह्यात जोरदार वारे, विजांसह पावसाची, तर सातारा आणि सोलापूर जिल्ह्यात विजांसह पावसाची शक्यता हवामान विभागाने वर्तविली आहे.

मंगळवारी (ता. २१) सकाळपर्यंतच्या २४ तासांमध्ये डहाणू येथे देशातील उच्चांकी ३६.६ अंश सेल्सिअस तापमान नोंदले गेले. सांताक्रुझ येथे कमाल तापमानाचा पारा ३६ अंशांच्या पार आहे. उर्वरित राज्यात कमाल तापमान ३१ ते ३५ अंशाच्या दरम्यान आहे.

किमान तापमानातही चढ-उतार सुरूच असून, गारठा कमी झाला आहे. मंगळवारी (ता. २१) जळगाव येथे राज्यातील नीचांकी १४.९ अंश सेल्सिअस तापमानाची नोंद झाली. राज्याच्या किमान तापमानात वाढ होण्याचा अंदाज आहे.

मंगळवारी (ता. २१) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३१.५ (१७.४), जळगाव ३२.५(१४.९), कोल्हापूर ३०.५ (१९.८), महाबळेश्वर २६.१ (१५.९), नाशिक ३१.७ (१६.८), निफाड ३०.८ (१५.४), सांगली ३१.० (१८.८), सातारा ३१.६ (१८.०), सोलापूर ३४.०(१८.४), सांताक्रूझ ३६.५(२४.२), डहाणू ३६.६ (२२.६), रत्नागिरी ३५.० (२२.४),

छत्रपती संभाजीनगर ३१.६ (१७.२), नांदेड ३१.० (१६.६), परभणी ३१.५ (१७.०), अकोला ३३.२ (१७.२), अमरावती ३२.४ (१८.३), बुलढाणा ३१.४ (१७.२), ब्रह्मपूरी ३३.८ (१८.३), चंद्रपूर ३१.६(१८.५), गडचिरोली ३१.० (१५.४), गोंदिया ३१.० (१६.०), नागपूर ३१.७(१६.३), वर्धा ३१.८(१७.४), वाशीम ३३.८(१७.०), यवतमाळ ३३.० (१५.५).