Cabinet Meeting : राज्य मंत्रिमंडळ बैठकीत शेतीतील कृत्रिम बुद्धिमत्तेचा महत्त्वाचा निर्णय घेण्यात आला आहे. कृषी-कृत्रिम बुद्धिमत्ता महाअॅग्री धोरण २०२५-२६ साठी मंगळवारी (ता.१७) मान्यता देण्यात आली आहे. त्यामुळे शेतीमधील कृत्रिम बुद्धिमत्ता म्हणजे एआयच्या वापराला चालना मिळेल, असा विश्वास व्यक्त केला जात आहे.
शेती क्षेत्रात एआयचा वापर करून उत्पादकता वाढवून खर्चात बचत करता येते. पाणी, खत आणि मेहनतीचं काटेकोर व्यवस्थापन करता येतं. त्यामुळे उत्पादकता वाढते, असं दिसून आलं आहे. तसेच जगभरात कृषी क्षेत्रात एआय, रोबोटिक्स, मशीन लर्निंगचा वापर केला जात आहे. त्यामुळे कृत्रिम बुद्धिमत्तेसह नवीन तंत्रज्ञानाचा वापर कृषी क्षेत्रात करण्यासाठी राज्य सरकारने धोरण निर्मिती केली आहे.
तसेच राज्यातील ॲग्रीस्टॅक, महा-ॲग्रीस्टेक, महावेद, क्रॉपसॅप, ॲगमार्कनेट, डिजिटल शेतीशाळा, महा-डिबीटी यांसारखे प्रकल्पांमध्ये कृत्रिम बुद्धिमत्तेचा वापर करण्यात येणार आहे. केंद्र-राज्य सरकार शेतकऱ्यांसाठी विविध योजना राबवतं. त्यामध्येही कृत्रिम बुद्धीमत्ता, निर्मितीक्षम कृत्रिम बुद्धीमत्ता, इंटरनेट ऑफ थिंग्ज, ड्रोन, संगणकीय दृष्टीक्षमता, रोबोटिक्स, पूर्वानुमान विश्लेषण यांचा वापर केला जाईल, असंही कृषी विभागाने सांगितलं आहे. याच पार्श्वभूमीवर पुढील पाच वर्षाच्या कृत्रिम बुद्धिमत्ता धोरणाला मान्यता देण्यात आली आहे.
राज्य सरकारने ऊस, भात, कापूस, सोयाबीन, कांदा आणि मका या पिकांसाठी एआयची धोरण निर्मिती केली आहे. त्याबद्दल अलीकडेच उपमुख्यमंत्री अजित पवारांनी माहिती दिली होती. तर यंदाच्या खरीप हंगामापासून कृषी विभागाकडून या पिकांमध्ये एआयचे प्रयोग सुरू करण्यात आले आहेत. तर ऊस पिकात एआयचा वापर करण्यासाठी वसंतदादा शुगर इन्स्टिट्यूट, सहकारी बँक आणि साखर कारखानदारांकडून शेतकऱ्यांना कर्जपुरवठा करण्यात येणार आहे. त्यामुळे शेतकरी या तंत्रज्ञानाला स्वीकारतील, असं जाणकार सांगतात.
बारामती येथील ऊस शेतीतील एआयचे प्रयोग यशस्वी झाल्याने राज्य सरकारने एआय शेतीच्या धोरण निर्मितीसाठी कंबर कसली आहे. राज्याचे उपमुख्यमंत्री तथा अर्थमंत्री अजित पवारांनी २०२५-२६ अर्थसंकल्पात एआयसाठी ५०० कोटींची तरतूद केली आहे. त्यामुळे राज्य सरकारकडून एआयसाठी पुढाकार घेतला जात असल्याचं जाणकार सांगतात. परंतु केवळ ऊस पिका एआयचा वापर मर्यादित न ठेवता राज्यातील प्रमुख कापूस, सोयाबीन, मका, कांदा पिकांमध्ये वापर करण्यात येईल, यासाठी राज्य सरकारने पुढाकार घ्यावा, असंही अभ्यासक सुचवतात.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.