PM Kisan : शेतकऱ्यांनी ई-केवायसी करावी

वाशीम : ‘‘जिल्ह्यातील पात्र शेतकरी पंतप्रधान शेतकरी सन्मान निधी योजनेच्या (PM Kisan Scheme) पुढील हप्त्यांच्या लाभापासून वंचित राहू नयेत, यासाठी राहिलेल्या ५० हजार ८८ शेतकऱ्यांनी येत्या चार सप्टेंबरपर्यंत ई-केवायसी (PM Kisan e-KYC) पूर्ण करावी,’’ असे आवाहन जिल्हाधिकारी षण्मुगराजन एस. यांनी केले.जिल्हाधिकाऱ्यांनी ई-केवायसी प्रलंबित असलेल्या शेतकऱ्यांबाबत आढावा घेतला. या वेळी ते बोलत होते.

षण्मुगराजन एस म्हणाले, ‘‘आधार कार्डला मोबाईल क्रमांक लिंक नसेल, त्यांनी उपलब्ध दुसरा मोबाईल क्रमांक ई-केवायसी करून घेण्यासाठी घेऊन जाणे आवश्यक आहे. या शिवाय स्वतः लाभार्थ्यांलाही कोणत्याही ॲन्ड्रॉइड मोबाईलवरून ई-केवायसी करता येईल. जिल्ह्यात १ लाख ८९ हजार ३४४ लाभार्थ्यांचे आधार प्रमाणीकरण पूर्ण झाले आहे. त्यांना पंतप्रधान शेतकरी सन्मान निधी पोर्टलवर ई-केवायसी पूर्ण करणे आवश्यक आहे. अद्यापपर्यंत जिल्ह्यातील ५० हजार ८८८ लाभार्थी शेतकऱ्यांनी ई-केवायसी पूर्ण केलेली नाही. त्यांनी त्वरित ई-केवायसी पूर्ण करावी.’’

‘‘पोलिस पाटील, तलाठी, ग्रामसेवक व कोतवाल यांनी संबंधित शेतकऱ्यांशी प्रत्यक्ष संपर्क साधून त्यांना सीएससी केंद्रावर किंवा आपले सरकार सेवा केंद्रावर घेऊन यावे. त्यांची ई-केवायसी करण्यासाठी मदत करावी. ॲन्ड्रॉइड मोबाईलवरूनसुद्धा ई-केवायसी करता येते. गावपातळीवर दररोज दवंडी द्यावी. ई-केवायसीसाठी शेतकऱ्यांना प्रोत्साहित करावे,’’ असे निर्देश षण्मुगराजन एस यांनी दिले.