NCP Crisis : राष्ट्रवादी कोणाची?, समर्थक आमदार आणि खासदारांच्या प्रतिज्ञापत्रांसाठी लगबग

Ajit Pawar NCP : राष्ट्रवादीमध्ये बंड करत अजित पवार यांच्या नेतृत्वाखाली राष्ट्रवादीच्या नेते शिंदे-फडणवीस सरकारमध्ये सहभागी झाले. त्यानंतर पक्षामधील फुटीनंतर शरद पवार आणि अजित पवार असे दोन गट पडले असून आज दोन्ही गटांकडून बैठकीचे आयोजन करण्यात आले आहे. तद्पूर्वी समर्थक आमदार आणि खासदारांकडून प्रतिक्षापत्र घेतले आहे. मात्र, राज्यभरातील राष्ट्रवादीच्या पदाधिकाऱ्यांत शरद पवार की अजित पवार, अशी द्विधावस्था कायम आहे.

अजित पवार यांनी रविवारी (२ जून ) दुपारी सर्वांनाच धक्का देत उपमुख्यमंत्रिपदाची शपथ घेतली, तर त्यांच्यासोबत आठ नेत्यांनी मंत्रिपदाची शपथ घेतली. त्यानंतर शरद पवार यांनी भाजप विरोधात मैदानात उतरून लढाईची तयारी दाखवली . त्यानंतर त्यांनी कऱ्हाड येथील प्रितीसंगमावरील यशवंतराव चव्हाण स्मृतिस्थळावर अभिवादन करून नवीन लढाईला सुरुवात केली.

या पार्श्वभूमीवर दोन्ही गटांकडून समर्थक आमदार आणि खासदारांची जुळवाजुळव सुरू झाली. अजित पवार यांच्याकडून सकाळी ११ वाजता एमईटी इन्स्टिट्यूटमध्ये बैठक बोलावण्यात आली आहे. तर शरद पवार यांच्या गटाकडून यशवंतराव चव्हाण सेंटरमध्ये बैठक बोलावण्यात आली आहे. त्यामुळे अजित पवार यांच्यासोबत कोण आणि शरद पवार यांच्यासोबत कोण? याकडे सर्वांच्या नजरा आहेत.

या सत्तानाट्यानंतर दोन्ही गटाकडून राष्ट्रवादीच्या पदाधिकारी व कार्यकर्त्यांकडून अजित पवार की शरद पवारांसोबत असल्याबाबतची प्रतिज्ञापत्रे घेतली जात आहेत. सर्व जिल्ह्यातील कार्यकर्ते बैठकीसाठी पदाधिकारी रवाना झाले आहेत. आता दोन्ही बैठकींपैकी कोण कोणत्या बैठकीत दिसणार, यावर राष्ट्रवादी कोणाची?, हे स्पष्ट होणार आहे.