Ujani Dam : उजनीतील पाणी तूर्त पिण्यासाठी राखीव

Solapur News : पावसाळा सुरू होऊन दीड महिना होतोय, तरीही जिल्ह्यात समाधानकारक पाऊस झालेला नाही. त्यामुळे जिल्ह्याची वरदायिनी असलेल्या उजनीची पाणीपातळी दिवसेंदिवस खालावत आहे. आता उजनीतील पाणी फक्त पिण्यासाठीच राखीव ठेवले जाणार असल्याचे सांगण्यात येते. तसेच पावसाचा अंदाज घेऊन बॅक वॉटरवरील शेतीपंपाचा पाणीपुरवठा आगामी काळात बंद होऊ शकतो, अशी माहिती सूत्रांनी दिली.

मागच्या वर्षी या दिवसात पुण्यासह धरण क्षेत्रातील पावसाचे पाणी धरणात जमा होत होते. पण यंदा खूपच भयावह परिस्थिती आहे. पेरण्या खोळंबल्या असून, उजनीत सध्या अडीच हजाराचा विसर्ग येत आहे. तो विसर्ग दौंडचा नसून, स्थानिक परिसरातील पावसाचे पाणी आहे. खडकवासला धरण अजूनही ४८ टक्क्यांवरच थांबले असल्याने दौंडवरून धरणात काहीच विसर्ग येत नाही. दरम्यान, उजनी धरणाच्या बॅक वॉटरवरील शेतीला दरमहा साधारणतः एक टीएमसी पाणी घेतले जाते. बॅक वॉटरवर ३४ हजार ८०० हेक्टर क्षेत्र आहे. सध्या धाराशिव, नगर, इंदापूर, सोलापूरसह काही ‘एमआयडीसीं’चा पाणीपुरवठा सुरू आहे. पण आणखी १५-२० दिवस पाऊस न झाल्यास धरणातील पाणी केवळ पिण्यासाठीच राखीव ठेवले जाणार असल्याची माहिती सूत्रांनी दिली.

उजनीत उणे ३५.३ टक्के पाणी

बुधवारी (ता. १२) दुपारी एकच्या आकडेवारीनुसार उजनीकडे दौंडकडून १५८८ क्युसेक इतका विसर्ग सुरू होता. तर उजनी धरणामध्ये एकूण पाणी पातळी ४८७.९२५ मीटरपर्यंत आहे. एकूण पाणीसाठा ४४.८९ टीएमसी आहे, तर त्यापैकी उपयुक्त साठा उणे १८.७७ टीएमसी आहे. तर या पाण्याची टक्केवारी उणे ३५.३ टक्के इतकी आहे.