तूर आयातीला मुदतवाढीचे बाजारातून स्वागत!

पूणे : तूर आयातीची मुदत येत्या ३१ मार्चला संपणार होती. पण या आयातीला ३१ मार्च २०२३ पर्यंत मुदतवाढ देण्यात आली आहे. देशातील कडधान्य व्यापारी आणि उद्योजकांची संघटना असलेल्या इंडिया पल्सेस अँड ग्रेन्स असोसिएशन अर्थात आयपीजीएने सरकारच्या या निर्णयाचे स्वागत केले आहे. तर दुसरीकडे युवक काँग्रेसचे प्रवक्ता हनुमंत पवार यांनी हा निर्णय शेतकरी विरोधी असल्याचे म्हटले आहे.

एकीकडे हा एक सुनियोजित निर्णय असून व्यापार आणि उद्योग क्षेत्र तसेच ग्राहकांना फायदा होईल, असे आयपीजीएचे म्हणणे असले तरी देशात आधीच पुरवठा आधिक्य असताना आयातीला मुदतवाढ दिल्याने बाजारभाव वाढू शकणार नाहीत. आयपीजीए विविध मंत्रालयांच्या सतत संवादात असून संघटनेने आयात धोरणाची शिफारस केली आहे.

दुसरीकडे दोन दिवसांत संपेल तुर आयातीची मुदत संपेल आणि तुरीच्या दराला आधार मिळेल, असे जाणकार सांगत होते. मात्र सरकारने मंगळवारी (ता.२९) मुक्त तूर आयातीला एक वर्षाची मुदतवाढ दिली. त्यामुळे पुढील वर्षभर म्यानमार, बर्मा, मालावी, मोझांबिक, आणि केनिया या देशांमधून तूर आयात होत राहणार आहे.

तूर आणि उडदाच्या टंचाईमुळे भावावर परिणाम होण्याची भीती व्यक्त केली जात होती, असे आयपीजीएने म्हटले असून तूर आणि उडदाचे सध्याचे भाव एमएसपीच्या वर असल्याचा दावाही केला आहे. परंतु, प्रत्यक्षात परिस्थिती वेगळी असून राज्यातील काही बाजारांमध्ये आलेल्या ठराविक मालाला किमान आधारभूत किमतीपेक्षा जास्त भाव मिळालाय. त्यात लातूर, उदगीर, नागपूर, औराद शहाजनी, मलकापूर, हिंगणघाट, आणि लातूर बाजारांचा समावेश असून इतर सर्व बाजारांमध्ये तुरीची भावपातळी ₹५८०० ते ₹६१०० रुपयांच्या दरम्यान असल्याचे राज्य पणन महामंडळाच्या संकेतस्थळावरून स्पष्ट होते.