Congress Protest : संभाजी भिडे यांच्या विधानाचा तीव्र पडसाद, काँग्रेसचे राज्यभरात आंदोलन

Sambhaji Bhide Controversial Remarks : अमरावती येथे शिवप्रतिष्ठानच्या वतीने आयोजित एका कार्यक्रमात संभाजी भिडे यांनी महात्मा गांधी यांच्या संदर्भात वादग्रस्त वक्तव्य केले होते. या प्रकरणी राजापेठ पोलिस ठाण्यात शुक्रवारी (ता. २८) रात्री उशिरा भिडे, अविनाश मरकल यांच्यासह आयोजकांविरोधात गुन्हा दाखल करण्यात आला आहे.

अमरावती येथे आयोजित एका कार्यक्रमात महात्मा गांधी यांच्याबाबत धक्कादायक वक्तव्य संभाजी भिडे यांनी केले होते. या वक्तव्याविरोधात देशभरात संतप्त प्रतिक्रिया उमटत होत्या. अनेकांनी समाज माध्यमांद्वारे भिडे यांचा निषेध केला. अमरावती येथील स्थानिक काँग्रेस पदाधिकाऱ्यांनी शुक्रवारी (ता. २८) राजापेठ पोलिसांकडे तक्रार दाखल केली होती. त्यानुसार पोलिसांनी गुन्हा दाखल केला आहे, असे राजापेठच्या पोलिस निरीक्षक सीमा दाताळकर यांनी सांगितले. या संदर्भात कायदेविषयक तज्ज्ञांचे मत घेऊन पुढील कारवाई केली जाईल. असेही त्यांनी सांगितले.

गुरुवारी (ता. २७) बडनेरा मार्गावरील सातूर्णा स्थित एका सभागृहात स्थानिक शिवप्रतिष्ठानच्या वतीने संभाजी भिडे यांच्या व्याख्यानाचे आयोजन करण्यात आले होते. त्यात त्यांच्यावर सामाजिक विद्वेष पसरविल्याचा आरोप ठेवण्यात आला होता. यानंतर भिडे यांच्या भाषणाची ध्वनिचित्रफित तपासल्यावर ही कारवाई करण्यात आली. पावसाळी अधिवेशनात देखील विरोधकांनी या मुद्द्यावर सरकारला घेरले आहे.