‘एचटीबीटी’प्रकरणी शेतकरी संघटनेचे नितीन गडकरींना साकडे

अकोला  : देशातील शेतकऱ्यांना तंत्रज्ञान स्वातंत्र्य मिळावे व एचटीबीटी कपाशी वाणाच्या चाचण्या, प्रयोग सुरू करण्याच्या मागणीसाठी शरद जोशीप्रणीत शेतकरी संघटनेने जिल्ह्यातून आंदोलन सुरू केले. ठिकठिकाणी आंदोलने झाली असून, याची दखल केंद्राने घ्यावी व याला मंजुरी द्यावी, या मागणीसाठी शेतकरी संघटनेच्या पदाधिकाऱ्यांनी केंद्रीय मंत्री नितीन गडकरी यांची भेट घेत चर्चा केली. 

यावेळी संघटनेचे राष्ट्रीय प्रवक्ते ललित बहाळे, स्वतंत्र भारत पक्षाचे महाराष्ट्राचे अध्यक्ष दिनेश शर्मा, अमरावतीचे माजी जिल्हाप्रमुख राजाभाऊ पुसदेकर, शरद जोशीप्रणीत शेतकरी संघटनेच्या माहिती व तंत्रज्ञान आघाडीचे अकोला जिल्हाध्यक्ष लक्ष्मीकांत कौठकर व विजय नेव्हल उपस्थित होते.

जिल्ह्यात १० जूनला तंत्रज्ञान स्वातंत्र्य मागणीसाठी पहिले आंदोलन अकोली जहॉंगीर या गावात झाले होते. त्यानंतर ठिकठिकाणी आंदोलने झाली. या आंदोलनाचे हरियानामध्ये देखील पडसाद उमटले. ५ जुलैला हरियानामध्ये हे आंदोलन होण्याची चिन्हे आहेत. देशभर पसरत असलेल्या या आंदोलनाच्या पार्श्वभूमीवर शेतकरी संघटनेच्या शिष्टमंडळाने अनिल घनवट यांचे पत्र केंद्रीय मंत्री नितीन गडकरी यांना दिले. या भेटीत सकारात्मक चर्चा होऊन केंद्रीय पर्यावरणमंत्री प्रकाश जावडेकर यांच्याशी दिल्ली येथे चर्चा घडवून आणता येईल, असे आश्वासन श्री. गडकरी यांनी दिल्याचे संघटनेच्या वतीने सांगण्यात आले.