जत पूर्व भागात फक्त पंचनामे; अजून दमडीही नाही मिळाली

संख, जि. सांगली ः  दुष्काळी जत तालुक्यातील पूर्व भागात या चालू वर्षात अवकाळी पावसाने, तर या भागातील बेळोंडगी, हळ्ळी, बालगाव, करजगी, भिवर्गी, संख, अंकलगी, सोन्याळ, उटगी, उमदी, माडग्याळ, जाडरबोबलाद, माणिकनाळ, गिरगाव, मोरबगी, आंसगी यासह अन्य गावांतील फळलागवड केलेल्या व पिकाचे मोठ्या प्रमाणात अवकाळी पावसामुळे नुकसान झाले आहे. संबंधित विभागाने केवळ पंचनामे केले आहेत. अजून एक दमडीही मिळाली नसून शेतकरी संतप्त झाले आहेत.

हातातोडांशी आलेला घास पूर्णपणे वाया गेला आहे. त्यामुळे आज पुन्हा या भागातील हजारो शेतकरी कर्जाच्या ओझ्याखाली आहेत. फक्त या चालू वर्षी मध्येच अवकाळी पाऊस पडला, असे नाही. सतत तीन वर्षे अवकाळी पावसाने शेतकऱ्यांचे नुकसान होत आहे.

दुष्काळी जत तालुक्यातील पूर्व भागात द्राक्ष, डाळिंब, तूर, मका व अन्य पिकांचे मोठ्या प्रमाणात नुकसान होत आहे. दरवर्षी महसूल व कृषी खात्यामार्फत पंचनामे केले जातात. ग्रामसेवक, तलाठी, व कृषी सहायक यांच्या मदतीने पंचनामे पूर्वी सुद्धा केले आहेत. मात्र फक्त कागदावरच पंचनामे झाले. एक दमडीही शेतकऱ्यांना मिळाली नाही.

जत पूर्व भागातील शेतकऱ्यांना प्रत्यक्ष एक दमडी ही अनुदान मिळाले नाही. आता नुकसानभरपाई न मिळाल्यास जत पूर्व भागातील हजारो शेतकऱ्यांना घेऊन रस्त्यावर उतरणार आहे. -सोमनिंग बोरामणी, बेळोंडगीचे, ता. जत.